Di na yano ang malambuong Bohol
Samtang nagpaabot sa Pier Tres sa Dakbayan sa Sugbo sa barko nga moda namo sa Bohol, naghunahuna ko sa kadaghan ug kapaspas sa kausaban sa transportasyon gikan ug paingon sa Bohol ug Sugbo sa pagpanligid sa katuigan.
Dihay higayon sa kami pay mga bata nga nitibugsok ang plitehan gikan ug paingon sa Tubigon ug Pier Tres—P7 na lang—tungod sa kadaghan sa mga barkong nagpuhalay sa ruta. Mao toy nakaaghat sa mga batan-on sa Bohol pagtabok sa buntag aron pagtan-aw og sine sa Sugbo sa udto ug pagbalik sa Bohol sa hapon.
* * *
Di na sama kabarato ang plitehan karon. Salamat sa pagpanghawod sa dagkong mga kompaniya sa barko nga nilamoy sa gagmay nilang mga karibal. Apan mas daghan na karon ang kapilian.
Barkong ro-ro ang among giatangan nga nipasalig paghatod sa mga sakyanan sa pamilya nga among gikuyogan sa Tubigon sud lang sa usa ug tunga ka oras (wa kaabot sa Pier Tres ug wa sab kadunggo sa Tubigon sa gitakdang mga oras). Laing kapilian sa mga makargahan og mga sakyanan ug pasahero ang barko sa karibal nga kompaniya nga modunggo sa Tagbilaran City.
* * *
Nidaghan na pag-ayong mga molupyo ug mga dumuduong tungod sa paglambo sa turismo sa Bohol nga di na makalahus-lahos og pasutoy ang mga sakyanan bisan mas lapad ug sementado nang kadalanan nga nagliyok sa tibuok isla.
Dihang nahimo nang magsisibya, giingnan mi nga kadaghan na ma-semento ang highway sa Bohol—sa papel, sukad pa sa Dekada 70. Apan diha na natinuod pag-semento ang circumferential road sa pamunoan ni anhing Gobernador Erico Aumentado. Nga giingong may nakapakumbinser sa kasagaran sa mga sakop sa New People’s Army (NPA) nga pagsuway nga mag-tour guide ug sa ubang mas malinawong panginabuhi.
* * *
Gipahibawo ni Ernesto Pernia, ang Bol-anong sakop sa gabinete ni Presidente Rodrigo Duterte, nga di madayon ang pagtukod sa mga taytayan nga magsumpay sa Bohol sa Sugbo ug Leyte tungod sa kakuwang sa kuwarta ug teknolohiya.
Apan ang mas dagkong pantalan sa Bohol ug Panglao International Airport motino nga mas lig-ong bugkos sa mga Bol-anon ug ubang bahin sa kalibotan. Gawas nga di na mabalik ngadto sa P7 ang plitehan sa mas gawasnong kumpetinsiya sa mga barko.
- Latest
