Tingog ka ba o kasaba
MGA LAMAS SA KINABUHI - Fr. Rey Cui (Banat) - December 14, 2019 - 12:00am

Dunay kalainan kun maghisgot ta og kasaba batok tingog. Ang tingog nagdala og mensahe, kahulogan ug unod. Samtang ang kasaba nagdala lamang og kahasol ug kalangas ug way igong kahulogan nga makapaaghat sa kadaghanan aron siya paminawon. Hinunoa, tinubdan lamang siya sa kahasol ug kakapoy.

Si Juan Magbubunyag nahimong tingog kini tungod kay ang iyang pagbatbat dunay gidala nga mensahe nga makapaukay sa tanlag sa matag usa. Mao bitaw nga daghan ang nasuko kaniya sanglit natandog man ang ilang kasamdan. Sa matag higayon nga si Herodes makadungog kaniya, mahasol ang hari sanglit saba man ang iyang hunahuna ingon man ang iyang kasingkasing gumikan sa daghang mga binuhatan nga nakapalayo niya gikan sa kahitas-an.

Ingon man pud si Herodias nga nangita gyud og paagi mapatay lamang si Juan Magbubunyag. Tuod man nagmalampuson sila sa pamasin nga ang maong lakang maghatag kanila og kalinaw.

Apan ang maong sala mao man ang nakapahasol kanila og samot kay gipatay man nila ang tawo nga way sala aron matabonan ang ilang pagkamasalaypon.

Gisuroy ko ang hawanan sa parokya usa ka gabii niana. Bugtong uwang sa iro ang naghatag og musika sa gikapoy kong mga dalunggan. Ang uwang sa mga iro naghatag ba kaha kanako og timailhan nga haduol na ang katapusan?

Apan sayop ko kini tungod kay ang maong pag-uwang sinugdanan pa lang diay sa ilang limbationg pagpangita sa ilang mamahimong kapares aron pagpasanay sa mga iroong kaliwat. Ang uwang dili diay panungo.

Ang uwang pagtawag dapit sa kalalakin-an sa mga irong kaliwatan nga ang kababayen-an andam nang magpapukan sa ika siyam nga higayon. Hinuon iro sila ug tawo kita.

Sa laing bahin, ang tingog daw sama sa gahum nga maghatag og kusog sa pagdapit sa uban nga mosunod niini. Sama gud sa usa ka pangulo. Ang tingog sa usa ka pangulo gisunod dili tungod kay nahadlok ang iyang mga sumusunod kondili tungod kay anaa man ang pagtahud.

Ning taliabot nga pagkahimugso sa atong Ginoo, atong gipaminaw ang tingog sa amahan nga nagtudlo kanato sa iyang pag-ingon: “Kini ang pinangga kong Anak, tumana ninyo siya!” ug kinsa gud kitang modumili niini?

Ang kagahob ug kasaba gumikan sa commercial nga pagsabot sa kasaulogan sa Pagkatawo sa Ginoo. Mao nga daghan nato ang wala gyud makontento tungod kay daghan nato ang mas nipatalinghog sa kasaba kaysa sa tingog.

Bisan gani sa atong paggamit sa atong social media accounts usahay puno lamang sa kasaba ug wa kitay tingog sanglit ato mang gituyo nga maganoy ang atong hunahuna ug kasingkasing kun unsay trending karon.

Nahapugwat ko sa dihang akong nakita ang akong itoy nga nga wala na maglihok kay dunay samad pinaakan ang liog. Wa siya katingog ug makalihok sa pagpatay kaniya nga linuog. Ang tanang dagkong iro nga suspetsado - kay di man makasabot sa sinultihan og tawo - akong gisilotan aron makaamgo sila nga usa ka dakong binuang ang pagpatay sa ilang isigka iro.

Kun tingog ba kining ako o kasaba bugtong ang tingog lamang ang nasayud. Ug kay hapit naman ang Pasko sa pagkatawo sa atong Ginoo, kita pud unta makahatag og tingog inay kasaba ngadto sa atong isigkaingon. Hinaut pa unta.

GINOO JUAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with