No gift policy

Ber-month na. May mga tv networks nga nagsugod pag-ihap pila ka adlaw na lang ang paaboton ug saulogon na sab ang Pasko – ang adlaw nga tinghatag ug tingdawat og pinaskohan.

Sa mga nangaging administrasiyon, gitugotan sa top management nga mahimo rang modawat kaming mga empleyado og Christmas gift gikan sa among customers. Hinuon, may gitakdang pipila ra ka adlaw kutob. Basta, kinahanglang di molapas sa Disyembre 25.

Dinhi nakita nga ang kinagalantihang customers nga mohatag og pinaskohan mao ang mga Tagalog. Ordinariyo ra nila ang paregalog polo shirt nga ‘Lacoste’ ngadto sa mga buotan ug mahigalaong kawani.

Gani, dihay pipila ka opisyal nga ilang FX Tamaraw nga sakyanan mapuno sa mga mahalong regalo.

Malipayon ilang Pasko niadtong higayona. Mga talad-kan-anan panahon sa Noche Buena buhong sa mga imported fruits and wine sama sa first class Fuji apples ug mga Henessy XO brandy o Johnny Walker Blue.

Grabe modalit og pamaskong regalo ang mga Tagalog.

Kinartong grapes, pears, apples, etc., diin ang tungatungang bahin lubngan og mahalong imported nga bino.

Masinati gyud sa mga empleyado ang tinuorayng kahulogan sa paskohanong awit nga ‘Give Love on Christmas Day.’

Apan dihang si Pres. Rodrigo R. Duterte nay nakalingkod sa trono sa Malakanyang, ang maong naandang kalipay panahon sa Pasko naputol human ipakatap sa tanang buhatan sa gobiyerno ang iyang kamandoan sa hugtanong pag-implementar sa ‘NO GIFT POLICY’. Kay kuno dinhi magsugod paggimok ang kagaw sa korapsiyon.

Nakalimot siya nga ‘refusing an offer without condition is a great insult.’ Hinungdan, nga duha ka habig ang gisakitan: ang gustong mohatag ug ang gustong modawat.

Niadtong Pasko 2018, daghang kasingkasing ang nagusbat. Mga bundles of joy wala dawata ug mga gift certificates giitsa puwera.

Usa ka customer nagpakiluoy: “Boss, bisag in the spirit of Christmas na lang, di gyud ninyo dawaton ang among regalo?”

“Sir, sorry kayo. Di gyud!” Pintok kong tubag. Ug gaan kayo pirme ang bagahe sa akong sakyanan kada pauli ko sa amoa hangtod natapos ang Pasko.

Sama kagaan sa akong konsensiya nga wala gyud magpatintal sa materyal nga regalo kay maoy gipalabi-busog ang espirituhanong kinabuhi sa seryosong pagtuman sa ‘NO GIFT POLICY’.