Sa alas tres sa hapon
MGA LAMAS SA KINABUHI - Fr. Rey Cui (Banat) - May 22, 2019 - 12:00am

Dugay nasugdan ang kalihukan tungod sa uwan nga wala damha apan salamat sa gihapon kay diha sa minanok nga paghikatulog dunay higala nga nakaila. Nganlan lang nato siya og Mafe usa ka maestra. Taason ning bayhana, morena ang pamanit ug kun pakalitan og tan-aw artista gyud ang bayhon.

Anaa kaniya ang simple nga pahiyom apan kining maong pahiyom puno sa pagkamabihagon. Apan ang nakapahimo kaniyang interesante mao ang iyang kadasig nga mohimo og maayo alang sa kabataan bisan pa man kun siya gikapoy na.

Nahunong ang kukabildo sa dihang niabot ang parade timailhan nga pagasugdan na ang programa. Lingaw kaayo ang tanan sa ilang nakita ug nadungog. Yano ang kasaulogan apan makahuloganon.

Tinuod ang alas tres sa hapon mao ang takna nga namatay ang atong Ginoo apan kadtong mga higayona nabuhi ang pagtuo nga bisan diha sa kalisud ug kahagip-ot mahimong saulogon sa paagi nga halandumon. Daghan nato karon ang buot mosaulog og bisan unsa diha sa mas komplikado nga paagi.

Daghan nato ang dili makontento kun unsay naa sa karon ug kay dili man makontento nan, imbis malipay kita nagbaguod. Apan bisan pa niini wala kita magsapayan kay buot man natong malipay sa kasamtangan. Diha sa pagsaulog atong hinumdoman nga mas bililhon ang presensiya sa usag usa kay sa bisan unsang inandam nga hikay.

Ang kukabildo maoy naghatag og kalangay bisan pa man kun buot nato nga magdali aron sa sunod nga buluhaton kita makahuman.

Ang pagtugot sa kaugalingon nga magpabilin taliwala sa kapaspas sa hinagtik sa orasan mao ang pagpakita sa atong kamanggihatagon sa atong panahon ug sa atong kaugalingon.

Si Maam nipakita sa maong kamanggihatagon. Ang iyang pahiyom nipasalig nga wala siya sayangi sa mubong panahon sa among panagkuyog apan nakita nako ang bili sa gitawag nilang panahon. Kini tungod kay dunay panagsama ang among baruganan ug panlantaw nga tungod niini nahimo kitang nalipay bisan sa daklit lamang. Daklit man tuod kini apan molungtad og dugay.

Human sa maong kalihukan ang yanong snaks among gipanag-ambitan dungan ang pagpasalamat sa higayon nga gisaw-an. Ug sa akong pagsakay sa multicab may nahinumdoman ko nga dunay pag-umangkon nako nga nabilin sa kumbento ug tuod man sa akong pag-abot didto grabe ang kamug-ot  sa iyang nawong ug wala na magpahikap pa kanako kay dugay gyud diay niyang pinaabot nako. Ang takna nga makalimtan usahay maghatag og kalaay sa hingtungdan nga dunay mahinungdanong tuyo.

Ang mensahe simple lang gyud kaayo ug kini mao nga diha sa atong paghimo og pakiglambigit atong hunahunaon nga dunay mga tawo nga kanato usab nagpaabot. Ang pag-budget sa panahon angay gyud buhaton aron ang mga kalihukan  nga uban dili unta mapagan.

HAPON
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with