Napagan sa politika
LINTUNGANAY - Fred P. Languido (Banat) - March 10, 2019 - 12:00am

Wala gyud kaagwanta sa pressure gikan sa kagamhanan sa Dakbayan sa Mandaue ang mga tagdumala sa Big Hotel.

Ang pangulo sa Cenore Corporation nga si Roderick Ngo mipahibawo sa ilang hukom nga sirad-an ang operasyon sa Big Hotel tulo ka buwan gikan niadtong Biyernes.

Nunot sa desisyon sa kompaniya, 300 ka mga kawani sa hotel ang mawad-an og trabaho.

Sa iyang suwat ngadto ni Mandaue City Mayor Luigi Quisumbing gipahibawo ni Ngo ang desisyon sa ilang kompaniya.

Apan bisan niini iyang giinsister nga legal ang ilang kontrata sa paggamit sa yuta sa dakbayan.

Ang Cenore Corporation nag-abang ni sa yuta nga maoy gitukuran sa Big Hotel. Apan ang ilang kontrata dili direkta sa dakbayan sanglit ang maong luna unang giabangan sa Katumanan Hardware.

Ang Katumanan Hardware maoy mipaabang sa luna ngadto sa Cenore Corporation. Kini maoy hinungdan nga gikwestiyon sa administrasyon ni Quisumbing.

Matud nila nga way pagtugot gikan sa konseho ang kontrata sa Katumanan ug sa Cenore.

Ambot unsay kondisyon sa orihinal nga kontrata tali sa Katumanan ug sa Dakbayan sa Mandaue, apan kun sintido common ang basihan wa nay labot ang dakbayan sa kasabutan sa Cenore ug Katumanan.

Tataw nga politika ang lintunganay niining maong kontrobersiya kini tungod kay ang maong transaksiyon pipila lang sa mga kontrata nga gisudlan kaniadto ni kanhi mayor Jonas Cortes nga gigukod ni         Quisumbing.

Ang luoy mao ang mga negosyante ug ordinaryong trabahante nga napagan sa politika diha sa Mandaue.

Ang maong kontrobersiya di makatabang sa tinguha ni Quisumbing nga masublian sa katungdanan.

Kini tungod kay sigurado nga ang pamilya sa mga trabahante nga nakulban sa kaldero masilag kaniya.

Bisan unsaon nila sa pagpasabot nga interest sa dakbayan ang ilang tumong dili gyud matago ang nagpahipi nga motibo sa politika.

Di hingpit nga limpiyo ang mga kamot ni Quisumbing sa iyang pagkwestiyon sa kabarato sa abang sa luna nga nahimutangan sa Big Hotel tungod kay siya mismo misulod og kontrata uban sa San Miguel Foods Corporation nga mas grabi pa ka barato ug hapit nalang ihatag nga libre ang yuta sa dakbayan.

Kun gikwestiyon ni Quisumbing ang P12 matag metro kwadrado nga paabang ni Cortes kaniadto, nganong iyang gipaabangan og 75 centavos ang kapin sa 31 mil ka metro kwadrado nga luna sa dakbayan ngadto sa San Miguel Foods?

Dinhi mosihag ang tinuod nga motibo ni Quisumbing niining maong kontrobersiya.

POLITIKA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with