Abo ka gikan, abo ka pauli

Mao kini ang gisulti sa pari matag badlis niyag itom abo sa agtang sa mga nanimbahay sa miaging Ash Wednesday.

Ang badlis paubos nagpahinumdom sa adlaw niadtong kita, tawo, gihimugso. Samtang ang badlis pababag nga maoy mikompleto pagpormag krus nagtug-an nga walay usa nato ang mogamot ning kalibotan, kitang tanan mangamatay gayud pag-abot sa utlanan nga kuhaon na sa atong Magbubuhat ang hinulaman tang kinabuhi.

Ang krus nga gibadlis sa agtang nagsimbolo sa tahas nganong nagpakatawo ang Ginoo dinhi sa kalibotan sa persona ni Hesukristo. Nagsapnay-padayag kini sa Iyang mga pag-antos sama sa pagdakop Kaniya sa mga Hudiyo bisan Siya walay sala, sa pagpas-an sa balabag subay sa batoong dalan paingon sa kalbaryo, diin samtang nagbaguod nga naglakaw, gibunalan sa latigo, gilud-an, gibugalbugalan, gipurongpurongan sa mga tunok ug gilansang sa krus – ang kahoy nga maoy gikargahan sa tanan tang sala, diin Siya maoy nagpas-an ug nagpakamatay aron lamang kita maluwas.

Sa laktod, Iyang gipakita unsay angay buhaton sa tawo aron kita maluwas. Gitanyagan ta Niya’g kaluwasan - ang pagpas-an usab sa kaugalingon tang krus. Ug ato ba kining gidawat? Misunod ba ‘ta sa Iyang mga sugo ug sa maong mga tunob sa kaluwasan nga Iyang gibilin nato sa wala pa Siya mobalik sa langit? 

Subo kaayong palandungon, nga ning kalibotan, ambot, pipila na lang ka porsiyento ang mitoo’g Ginoo. Ambot, kun makaabot bag 5%. Ngano? Tungod kay sa higayon nga makahimo tag sala, sama rang wala ta motoo nga adunay Ginoo.

Kana lang ‘Love your enemies’ nga kabahin sa Iyang mga sugo, haskang daghana sa dili makapasar ini. Gani, ultimo atong simbahan ug si Tatay Digong nagsige mag away.

Mao nga nalipay ko. Nga sa miaging Ash Wednesday, puno ang simbahan sa mga Romano Katoliko nga nagpabadlis sa agtang. Kay alang nako, kining pagpabadlis pareha ra sa nagpinirmahay’g kontrata ang nagpabadlis ug ang Ginoo atubangan sa altar, diin ang unod mao ang pagpuasa pinaagi sa hingpit nang pagbiya sa tanang sala. Ug dili na gyod magpakasala.  Buwahan, pag-abot sa higayon nga kita mobalik na sa abo, ang atong espiritu mosaka sa langit ug adto na papuy-a sa atong Ginoo forever.