Tsansa ni Labella

Opisyal na gayud nga giindorso ni Presidente Rodrigo Duterte si Cebu City Vice Mayor Edgardo Labella sa oposisyon isip iyang kandidato alang sa pagkamayor dinhi sa dakbayan sa umaabot nga eleksiyon sa Mayo.

Sa rally sa mga kandidato sa PDP-Laban sa Plaza Independencia dili pa lamang dugay, mismong si Duterte ang miisa sa kamot ni Labella. Kini isip pag-indorso sa bise mayor sa iyang pagpakigharong kang Mayor Tomas Osmeña karong umaabot nga piniliay.

Alang kang Labella, dakong puntos kining pagsuporta sa presidente sa iyang kandidatura ug sa iyang lineup sa oposisyon. Mianhi gayud si Duterte aron lamang pagpakita sa iyang suporta kanila ug alang sa pagpangampanya sa iyang mga kandidato pagkasenador.

Hinuon dakong hagit usab alang kang Labella ang pagpakita og dakong paningkamot aron pagdani og mga botos. Ug sa iya unya nga pagpangampanya, angay lamang nga ibandera ug ikapanghambog ni Labella ang suporta gikan sa Malakanyang.  

Apan dili usab nato ikalimod nga lig-on ang iyang kaatbang ug daghan kini og resources tungod lagi kay maoy naglingkod sa labing gamhanan nga bangko sa City Hall. Dili lamang kana, hangak usab nga pildehon ang apelyido sa iyang kaatbang.

Niining maong kalamboan, dili gayud angay nga mokumpiyansa si Labella bisan pa man kun anaa na kaniya ang suporta sa presidente. Dili na ikatingala pa nga daghan na ang napildi sa eleksiyon tungod lagi sa subra nga bilib sa suporta gikan sa mga anaa sa gahum apan kulang diay sa paningkamot.

Hinuon wala pa ang panahon sa kampanya alang sa lokal nga mga kandidato. Inig sugod na unya niini, makapaabot kita nga moarangkada usab si Labella ug ang iyang lineup ngadto sa mga kabaranggayan.

Sayang kun dili gayud sakyan pag-ayo ni Labella ang suporta ni Duterte sa iyang kandidatura. Dili nato ikalimod nga grabe karon ang impluwensiya sa presidente sa mga Sugboanon. Ug angay lamang nga i-take advantage kini sa bise mayor.

Sa akong nakita, dako ang tsansa ni Labella batok sa iyang kaatbang sa panahon na unya sa piniliay. Hinuon layo pang Mayo ug daghan pa ang mahitabo. Ang kadaugan sa usa ka kandidato nag-agad usab kun unsa ka epektibo ang iyang estratehiya.