Arrest warrant ni Trillanes gikahimuot
Si Senador Antonio Trillanes IV nailhan na sa iyang pagkarebeldeng sundalo.
Siya ang nangulo sa Magdalo group nga niilog-kontrol sa Manila Peninsula aron ipalanog ang ilang kasuko batok sa administrasyong Arroyo.
Napriso si Trillanes ug ang iyang mga kauban. Apan dihang si PNoy Aquino na ang na-presidente sa Pilipinas, gihatagan silag amnesty sa sige lang og tingsi nga pangulo ug nahimong gawasnon si Trillanes kinsa nidaug pa sa eleksiyon dihang nilansar sa pagka-senador.
Gumikan sa utang na loob, wala lang mahimong diehard protector si Trillanes ni PNoy, kondili, nagkasuod pa og maayo ang duha diha sa ilang pagpangalagad sa nasud diin ubay-ubay’ng kontrobersiyal nga transaksiyon ang ilang gitipigan.
Gikan sa Scarborough Island ngadto na sa paglipang sa negosyong shabu sulod ug gawas sa Bilibid panahon nilang PNoy, Senador Leila de Lima ug Trillanes, makalibog nganong gipasagdan lamang nila kini nga modako ug mobaha sa atong nasud?
Sukad na-presidente si Tatay Digong, wala gyud ta makadungog nga nisuporta si Trillanes sa “Change is Coming” nga programa ni Duterte. Imbes, moayuda ang rebeldeng senador, nagsige hinuo’g kontra ug labay’g lapok ngadto sa abogadong pangulo kinsa murag gi-under estimate lang sa walay respetong Trillanes nga murag ang trabahong nakat-onan didto sa Senado mao ra ang pagsige lag away - hatag og labad sa ulo ni Tatay Digong.
Apan gidemalas si Trillanes. Nasakpan ni Solicitor-General Jose Calida nga ang gihatag nga amnesty ni PNoy ngadtong Trillanes wala mahasubay sa husto nga proseso, busa gikonsiderar nga void and invalid ang pagkagama.
Hinungdan nga gikanselar ni Tatay Digong ang amnesty nga taudtaud nang napahimuslan sa gisaligang alas sa taga oposisyon ug mga yellowtards.
Gusto sa pangulo sa Pilipinas nga maisyuhan og arrest warrant si Trillanes.
Busa, iya kining gipa-review sa mga RTC judge diin didto gi-file ang maong amnesty. Ug dihang namatud-an sa korte nga may legal basis ang gipamahayag ni Tatay Digong, nalutsan gyud ni Makati City RTC Branch 150 Judge Elmo Araneta og arrest warrant si Trillanes sa niaging Martes, Septiyembre 25.
Gikaguol kini sa mga gatosang supporters ni Trillanes apan gikahimuot sab pag-ayo sa minilyong President Rodrigo Roa Duterte’s diehard supporters.
- Latest