Alas sa barato ug lahutay
Si Jeff Bezos, nga mao na karon ang labing adunahang tawo sa tibuok kalibutan human niya naapsi si Bill Gates pila ka buwan ang nilabay, may duha ka alas nga giisip nga maoy mga hinungdan sa talagsaon nga paglambo sa Amazon ug uban niyang patigayon:
Una, ang paghimo nga labing barato sa iyang mga produkto aron nga dili magtagad pagribal ang iyang mga kumpetensiya; ug
Ikaduha, labaw sa paglantaw lapas sa tumoy sa iyang ilong gisukod ang katukma sa iyang mga lakang kon lantawon pagbalik pila ka dekada gikan karon.
* * *
Labing klaro nga ebidensiya sa duha ka alas mao ang paglusad sa Kindle niadtong Septiyembre 2012:
Labihang ngil-ara og dagway ug labihang baratoha og presyo sa ebook reader sa Amazon nga wa’y nagtuo, gawas tingali ni Bezos sa nag-ung-ong nga dako niining kalamposan.
Labaw sa tanan, ang pagtakda niya sa ubos kaayong presyo sa Kindle, nga wa’y bisan usa ka dako nga ganansiya kay gipaulian ra ang gasto sa hardware, nakapugong sa higante niyang mga karibal sama sa Apple, Microsoft ug Google sa paghimo dayon og ilang kaugalingon nga ebook readers.
* * *
Laing ebidensiya ning taktika ni Bezos mao ang paglusad niya sa Alexa, ang virtual assistant nga motubag sa bisan unsang pangutana ug motuman sa bisan unsang sugo, niadtong Nobiyembre 2014.
Wa magtagad ang iyang mga kumpetensiya sa pagribal sa produkto kansang dako nga kapuslanan wa dayon mabatyagi.
Naabtan ang Google og usa ka tuig una nakahimo sa Google Home pag-apas ni Alexa ug duha ka tuig ang Apple una nakahimo sa iyang kaugalingong HomePod.
Samtang mas utokan ang Google Home, labihang daghana na nga kahimanan ug serbisyo nga nakiglambigit ni Alexa nga labihang lisura na nga matumbasan. Ang HomePod mahal ug dili masugo.
* * *
Sulod sa daghang katuigan, wa’y ganansiya ang Amazon. Giapura si Bezos paghimo’g kausaban aron moganansiya, apan gisubay ni Bezos ang iyang kaugalingong panglantaw.
Karon ang Amazon, 24 ka tuig human natukod, mao na ang labing dakong tindahan sa tibuok kalibutan ug labing seryusong hulga sa uban pa nga mga industriya.
Nipasabot si Bezos nga sa dili pa siya mohimo og desisyon, mangutana una siya sa iyang kaugalingon:
“Makapasigarbo ba ko niini kon magpangedaron na’g 86?”
* * *
- Latest
