Ang kawsa nga way padulngan

Nipaambit kanako sa iyang kasinatian ang usa ka higala nga nahimong busy diha sa pagtagad sa panginahanglan sa uban.

Nipadayag siya sa iyang kasagmuyo kini tungod kay nahimong daw walay bili ang iyang paningkamot. Wala kini makit-i sa mga tawo nga iyang gialagaran. Ako siyang giingnan nga dili maayo nga ikaw magkuwenta kay after all homo homini lupus ang mga tawo ning panahona. Kun mangayo sila nimo og gatas mahimong apilon nila pagpaak ang imong atngal.

Kun mangayo sila nimo sa gugma mahimong tilokon hasta ang imong atay. May padulngan man o wala ang imong kawsa hinumdomi nga dinhi sa kalibutan dili na kinahanglang duna kitay ipamatuod. Ang pagkugi ingon man ang pagsubay sa dalan sa katarong maoy bugtong paagi sa pagpadayag sa uban nga gigamit mo ang kinaadman nga kanimo gipaambit gikan sa kahitas-an.