Natural nga remedyo sa goiter (2)

Unsa man gayud ang sagad nga sintomas sa goiter? Usa na niini ang pisikal nga makita nato, mao ang bugon nga nitubo ubos sa ‘vocal chord’ o ‘adam’s apple’ sa may totunlan. Kon ngano kini, gumikan kay wala na kaayo makatrabaho o mogana ang atong thyroid gland.

Mao nga usahay mora ta’g matuk-an nga maglisud sa pagtulon. Ingon sa maghuot ang totunlan, unya usahay motukar ang ubo ug hapdos nga mokaras ug pagawon kanunay. Usahay maglisud sab sa pagginhawa, kon grabe na ang goiter.

Unsa na man sab ang mga risgo o mga hinungdan sa goiter? Sigun sa mga pagtuon, ang naglabi gyud nga hinungdan niini mao ang kakulang sa ‘iodine’. Ang mga babaye mas kumon mataptan sa goiter. Kon magkaedad na nga motungtong o molapas sa 40, dako sab ang kahigayonan nga matuboan niini ug dili sab malikayan kon kini kaliwat gyud nga makasinati og goiter.

Mahimo sab sayd-epek kini sa medikasyon o tambal nga giinom para sa problema sa ‘auto-immune’ ug sa sakit sa kasingkasing, sama sa ‘antiretroviral’, ‘immune suppressant’, ‘psychiatric lithium drug’, ug etc. Hasta sab niadtong mabdos o nagmenopos, sa wa’y klaro nga hinungdan, matugkan sab sa goiter.

Nan karon, unsa na man sab ang natural nga pang-alibyo niini? Halos 74% sa himsog nga hamtong, nakita nga posibleng kulang sa iodine, ilabi na sa mga nasud nga maugmaron. Matud pa, mas nagkadaku karon ang kahigayonan sa goiter tungod sa kakulang sa iodine, ikompara sa nakalabay nga 40 ka tuig.

Kon ang hinungdan sa goiter, sagad gumikan sa estilo sa dili maayo nga pagkaon, ania ang mga sugyot nga maisip nato nga natural nga remedyo. Mas maayo nga ato kini himuon nga giya alang sa katibuk-an nga kahimsog.