Pagburot sa presyo sa lana
Usa sa mga sukaranan sa economic managers ni Presidente Rodrigo Duterte pag-apura sa niagi pa nga tuig sa pagpahamtang sa mas dako nga Excise tax sa gasolina, krudo ug uban nga mga produkto sa lana, mao ang kabarato sa presyo sa lana sa merkado sa kalibotan.
Masaligon si Finance Secretary Carlos Dominguez III nga mas sayon alang sa mga Pilipinhon ang pagdawat sa dugang nga buhis sa lana kon ubos pa ang presyo kay nagbaha pa ang suplay sa lana ug luya pa ang kalibutanon nga demanda. Apan naapsan siya sa panahon.
* * *
Dihang gituki sa Kongreso ang giduso sa Malakanyang nga Tax Reform for Acceleration and Inclusion (TRAIN) sa niagi nga tuig, nagsugod na og saka pagbalik ang presyo sa lana, kay nagsugod na og epekto ang pagpatuman sa kauyonan sa paglaslas sa kalibutanon nga produksiyon sa lana.
Naumol ang kauyonan tungod sa pagpamugos sa Saudi Arabia sa mga sakop sa Organization of Petroleum Exporting Countries (OPEC) ug sa Russia sa mga nasud nga dili sakop sa OPEC. Aron makalahutay ang pagburot sa presyo, gilugwayan nila ang kauyonan hangtud sa Marso ning tuiga.
* * *
Mao nga ang pagpahamtang sa Excise tax karong adlawa mahimo nga mas makalilisang kay nadungan sa ikaupat na ka semana nga sagunson nga pagsaka sa presyo sa mga produkto sa lana. Gikabalak-an nga magpadayon ang pagmahal sa lana tungod sa mosunod:
Nitibugsok ang produksiyon sa lana sa kina-ubsan nga ang-ang sukad sa 2015;
Padayon ang pagsaka sa kalibutanon nga demanda ngadto sa 1.5 milyones ka baril sa lana matag adlaw; ug
Padayon ang politikanhon nga mga krisis sa Iran, Venezuela ug Saudi Arabia.
* * *
Apan may mga eksperto sa industriya sa lana nga nangagpas sab nga mobalik sa pagtibugsok ang presyo sa lana sa mosunod nga mga semana:
Paspas gihapon ang pagsulbong sa produksiyon sa lana nga mahimo nga makaduso sa kalibutanon nga suplay nga mas daghan sa demanda sa una nga unom ka buwan ning tuiga; ug
Magpanilap sa taas nga presyo ang shale oil producers sa Estados Unidos, nga wa’y apil, ug busa dili mahigot sa kauyonan sa OPEC ug Russia, sa paspas nga pagpaburot sa ilang produksiyon.
- Latest
