Pabor-pabor

Basin og nagtuo si Commission on Human Rights (CHR) chairman Chito Gascon nga nakalingkawas na siya sa pagsaway sa mga tawo sa iyang pagkanunay og sungag sa gobiyerno, human giuli sa Kongreso ang budget alang sa CHR?

Ang paghatag sa P1,000 nga budget sa CHR alang sa 2018, nagsilbe kadto nga warning batok sa CHR aron kini magmabinantayon sa kanunay niining pagsungag sa administrasyong Duterte. Ang sunod, mao na ang impeachment.

Human niadtong tensiyon tali sa mga kongresista ug sa CHR, mitingog na usab si Gascon batok sa nasyonal nga kagamhanan.

Kagahapon, si Gascon miingon nga dili angay’ng magmaya ang administrasyon ni Duterte sa pagdawat sa 103 lang sa 257 ka rekomendasyon sa nasud nga sakop sa UN, mga 99 ang gimarkahan lang og “noted” samtang 44 nga adunay kalambigitan sa “war on drugs” ni Presidente Duterte wala dawata.

Kon adunay ebidensiya ang UN, ngano nga dili man niini pit-on og kaso si Duterte kalabot sa iyang pakiggubat batok drugas? Ngano nga pakaulawan pa man sa internasyonal nga komunidad?

Para nako, importante kaayo ang paglimpyo sa ilegal nga drugas sa Pilipinas. Mao kini ang wala nako hisabti nganong ang oposisyon, ilabi na ang Liberal Party, ug ang international community, kanunay man manawagan nga undangon ang pakiggubat batok sa gidili nga drugas?

Ang nahitabong patay atol sa ronda dili malikayan, ilabi na nga armado ang mga drug lord ug mga narcopoliticians sama sa mga Parojinog sa Ozamiz City. Unsa man diay gusto sa oposisyon, mobalik ang kagrabe sa gidili nga drugas sa nasud?

Karong mga panahona, aduna pa’y mga drug pushers nga naglihok sa tago, apan wala’y puas ang kapolisan ug PDEA sa paghimo og operasyon.

Kon maminaw kita sa UN, tabla ra nga atong gihatag ngadto kanila ang kaugmaon natong mga Pilipino, nga klarong wala g’yud sila’y mahimo.

* * *

Lisud pa nga tuohan ang sulti ni Mayor Tomas Osmeña nga wala siya’y paboran kon ipatuman ang balaod o ordinansa.

Duha ka edipisyo sa IT Park ang buot niyang ipasira tungod kay nakalapas kini sa Building Code kay ang parking lot niini gipaokupahan hinungdan nga ang mga sakyanan adto na mo-parking sa gawas.

Sa kadaghan sa mga edipisyo sa siyudad, nganong ang duha ka edipisyo sa IT Park ang iyang gikontrahan.

Husto si Konsehal Raymond Garcia nga kon gigukod ni Osmeña ang mga edipisyo nga malapason sa balaod, ilabi na kadtong wala’y mga parkingan, nganong dili man niya tan-awon ang ACTIEF, kanhi ACT nga gipanag-iya ni Kongresista Bebot Abellanosa nga iyang higala ug alyado sa BOPK ug Liberal Party?

Ngano nga dili man tan-awon sa mayor ang mga edipisyo nga gipanag-iya sa pamilyang Osmeña pagsuta kon wala ba kini mga kalapasan sa balaod?