Aron mas molungtad ang sakyanan

Bisan og unsa kabag-o ang atong sakyanan, kun sa pagmaneho kulang ta sa kahibalo sa maayong pagdala niini, dili magdugay ang sakyanan ug mahimong magkagang-kagang na ang dinaganan. Puwerhisyo na nga usahay makapungot kay nagsige la’g kaaberiya.

Walay undang sa gasto sa pag-ayo, hangtod magyaka nga dili na magamit. Haskang paita kay nagdagan ang datahan nga wa pa maimpas.

Busa ang sekreto ra gyud aron nga mas molungtad ug dugay nga kapahimuslan ang sakyanan mao ang maayong paggalam niini, ug sa kinaiya sa nagmaneho sa sakyanan nga giisip niya kining kabahin na sa iyang kinabuhi.

Mainampingon nga dili motugot mabun-og, busa ingon niini ang atong buhaton.

* Likayan ang libaongon — Dili kay yatakan ang gasolinador nga palayaton, maumpog intawon nga magkurog ang sakyanan, nga hasta nagsakay mangagho. Kun magpirmi kini, segurado manglugak ang mga piyesa ug ubang parte sa sakyanan ug magkaanam og kahibat. Panas pa sa sensilyong gibagnos sa hantakan, ang ligid mangahilis, ug ang lawas nga natay-og na, saba na pamation. Tiwasan sa makina nga kagalkal na’g inandaran, mura’g inagulo sa himatyon.

* Tan-awon sa ubos ang dalan nga subayon — Suhetuon ang kondisyon sa dalan aron makadisisyon og maayong kaagian nga dili matay-og ang sakyanan. Ang gipamutang nga pinaugdo nga gibabag sa dalan (road humps), angay mopahinay o kaha mosimang og laing agianan, ayaw ibagnos ang sakyanan sa mga dalan nga batuon ug gansangon (rough road).

* Motipas nga mabinantayon — Dili mokompiyansa sa pagtipas og laing agianan (road lanes), kalagmitan kuyaw nga masaghiran ka o madisgrasya, seguroa nga dili morisgo sa disgrasya kay maapil dili lang sakyanan mainutil, maamong hasta sab ang kaugalingon.