Nahadlok nga mapagan

Nagpatawag og coordination meeting ang Cebu City Police Office, uban ang nagkadaiyang sektor sa relihiyon nga gilangkoban sa mga pari sa simbahang Katoliko, mga pastor sa protestanteng simbahan ug mga Imam sa Muslim community.

Gituki nila kun unsa ang matampo, o natampo sa kampanya batok sa ilegal nga drugas. Gisuna usab ang mga nanambong kun andam ba sila mouban kun adunay ipahigayon nga operasyon ang kapolisan ug PDEA batok sa illegal drugs.

Apan adunay pagduhaduha ug kabalaka ang anaa sa relihiyosong pundok sa awhag nga pagpauban kanila sa aktwal nga pagpangronda. Gipadayag ni Monsenyor Joseph Tan, ang tigpamaba sa Archdiocese of Cebu, nga walay kasinatian ang mga pari sa gimbuhaton nga iya lang sa mga otoridad.

Basin kuno og mahimo na hinoon sila nga liability o tulobagon sa kapolisan, simbako unsay mahitabo atol sa operasyon. Dili hinoon pugngan sa simbahan kun adunay pari nga mokuyog sa Tukhang.

Ingon usab niini ang gipadayag sa Imam sa Islam, kinsa gipaagi niya og komedya ang iyang komentaryo nga magdala na lang sila daan og tubig kay sa higayon nga mapagan sila ug mapatay, limpyohan na lang ug deretso ilubong.

Samtang ang mga pari magbalon na lang og bendita, aron kun dunay mapatay deretsohon na lang sa pagbendisyon. Hinoon wala pa gyud masaboti sa PNP ug sa religious sector kun mokuyog ba sila sa Tukhang operation.

Apan gipaneguro nila nga ilang ipakaylap sa katawhan ang espirituhanong pagkabig sa mga tawo sa pagsalikway sa illegal drugs. Apan para nako mas maayo nga sulayan sa mga pari ug pastor ang pag-uban sa operasyon aron magiyahan usab, dili lang ang mga kriminal, kun dili, apil ang mga otoridad.

Wala pa gani sila nakasulay, nahadlok na man.