Kaso ni de Lima

Misaler gayud sa unang ang-ang ang kaso nga may kalabotan sa ilegal nga druga nga gipasaka batok kang Senadora Leila de Lima. Gidakop ang  senadora kaniadtong Biyernes sa hapon human kini malutsi og warrant of arrest sa Muntinlupa regional trial court.

Karon atua gidetiner sa Philippine National Police Custodial Center sa Camp Crame si de Lima. Kauban niya ang mga kanhi senador nga silang Jinggoy Estrada ug Ramon Revilla Jr. kinsa kasamtangan  usab nga nagtingkagol sulod sa maong pasilidad.

Apan daghan ang mibatikos sa timing sa pag-issue sa warrant of arrest batok sa senadora. Matud sa iyang kampo, klaro nga gidali-dali kuno kini pag-release sa korte. Hinuon wala pa mahusay ang mosyon nga gipasaka sa senadora batok sa maong kaso.

Karon, nagkapuliki na ang kampo sa oposisyon nga senador pagpangita og legal nga opsiyon aron nga mabaliwala ang maong kaso. Gani, ilang giduso karon nga wala kunoy hurisdiksiyon ang korte sa Muntinlupa pag-hearing sa kaso nga iyang giatubang.

Taliwala sa iyang pagkaaresto, mitumaw karon ang mga kabalaka nga kabahin kini sa political harassment batok sa mga kontra sa administrasyon ni Duterte. Nahibalo na kita nga si de Lima maoy nag-unang kritiko sa kampanya batok sa druga sa kagamhanan.

Apan, sa laing bahin, angay usab nga iprobar sa senadora nga tumo-tumo lamang ug walay basihan ang kaso nga gipasaka batok kaniya. Angay nga ipamatuod sa iyang kampo nga inosente siya sa maong mga akusasyon.

Kana kay nakakita ang korte og basihan sa mga akusasyon batok kaniya ug nga mipagawas na kini og warrant of arrest nagpasabot lamang nga adunay merito ang kaso ug padayon kini alang sa usa ka halapad nga pagdungog.

Makapaabot ang publiko og grabe nga depensa gikan sa senadora sa iyang tinguha nga maabswelto. Apan andam na usab siguro ang prosekusyon pagyagyag og mga ebidensiya mahitungod sa giingong kalambigitan ni de Lima sa ilegal nga druga.