Paling sa politikanhong hangin

Kadali ra gyud nga mausab sa panahon. Labi na ang mga panghunahuna sa atong mga senador ug mga kongresista. Sayo ning tuiga, mapasigarbuhon silang nihangop sa pag-aprobar sa Malakanyang sa ilang napasar nga talagsaong balaudnon pag-usab sa Sangguniang Kabataan (SK), pagtangtang sa gaway sa politikanhong mga dinastiya gikan sa kahugpongan sa mga batan-on ug pagtakda sa nalangay na nga piniliay karong Oktubre 31 ning tuiga.

Apan human lang sa pila ka buwan, nagkauyon na sab ang mga sakop sa Senado ug House of Representatives nga iuswag sa ikatulong sunudsunod nga higayon ang piniliay. Gibanhaw na sab gani sa liderato sa House ang karaan na nga lalis sa hingpit nang pagpapas sa SK.

* * *

Bisan si Presidente Rodrigo Duterte, kansang tingog labihan kagamhanan alang sa mayoriya sa mga sakop sa duha ka balay balaoranan, niusab sa iyang orihinal nga baruganan sa paghinayon unta sa dinungan nga piniliay sa SK ug sa barangay duha ka buwan gikan karon.

Nipadayag siya og kabalaka nga kay wa pa man mahuman ang iyang kampanya batok sa ilegal nga drugas, magbahang kuwarta sa mga sindikato ug ang mga gituboy sa mga durugista maoy modaog.

Klarong wa mobilib si Duterte sa sukwahing argumento sa pipila sa iyang mga alyado nga ang paghinayon sa piniliay makahatag sa mga botante ug kahigayonan pagtangtang sa mga opisyal sa barangay nga nakapusta sa mga durugista.

* * *

Napugos ang Commission on Elections (COMELEC) pagsuspenso sa nasugdan na untang pagprinta sa mga balota ug sa uban nilang pangandam. Nihangyo hinuon si COMELEC Chairman Andres Bautista nga hingpiton nang hukom sa pag-uswag sa piniliay karong adlawa, Septiyembre 1.

Apan samtang gikaintapan ang mga senador ug mga kongresista sa kalangay sa pag-umol sa labing mahinungdanon nga mga balaudnon apan kun magkauyon na gani, labi na kun may bendisyon sa Malakanyang, bahala na kun lalisunon pa kun makaayo ba sa interes sa publiko, mura silang kilat nga makapasar dayon sa nauyonan na nga balaudnon.

* * *

Ang labing dakong pildero kun mahinayon pag-uswag ang piniliay mao ang SK Reform Act nga giisip nga makasaysayanon kay maoy labing una nga nisuway pagpatuman sa probisyon sa 1987 Constitution batok sa politikanhong dinastiya pinaagi sa pagdili sa tanang paryente sa lokal ug nasudnong mga opisyal sud sa ikaduhang ang-ang sa dugo ug kaminyuon sa pagpanginlabot sa SK.

Mao nga dili kalikayan ang mga pagduda nga mahimong mao ni ang tinuod nga tuyo sa paglangay sa piniliay: Pagpug-ok sa balaod nga kun mapatuman mahimong mapalapdan ug makahulga sa ilang pagpanghawod sa ilang kalungsoran, dakbayan ug lalawigan.

O tingali paghatag lang ni nila og mas dakong kredito. Tingali hasta ang mga senador ug mga kongresista wa kahibawo kun asa sila sunod mopaling, agad sa huros sa politikanhong hangin. ([email protected])