Katorse ka mga mananagat ang gidakop sa kapolisan sa Daanbantayan tungod sa paggamit og ilegal nga matang sa pangisda nga gitawag og Danish Seine o mas naila nga "hulbot-hulbot" o "hulbot-sinaw."
Usa kini ka matang sa pagkuha sa isda nga diin guyoron sa panagatan ang usa ka pukot nga dunay kable, kadena o dagkong pisi sa ilawom ug daruhon ang corals, sea grass aron maabog ang tanang isdang nagpuyo niini padung sa ilang pukot.
Ang Danish Seine gidili na sa Bureau of Fisheries and Aquatic Resources sugod niadtong 2013 subay sa Fisheries Administrative Order 246 kay gikonsiderar kining makaguba sa kadagatan.
Apan ang nakaapan, gibuhian ra human nimulta og tag P2,500 ang matag usa kanila ug gikompiskar ang ilang mga nakuhang mga isda.
Ang dapit nga naagian niini di na kapanagatan kay naharos na man kini sa ilawom, ang resulta ang gagmay'ng mananagat maoy mag-agwanta pagdayo sa lawod aron lang makakuha og pipila ka buok nga isda. Apan mao ra ni? Mao ra ni silot sa mga mananagat nga niguba sa milyones ka tuig nang coral reefs ilawom sa kadagatan? Ingon ini ra diay ka barato ang nangagubang coral reefs?
Unsa man diay ning atong Fishery Code tiaw-tiaw ra? Bantog rang di mahadlok ang mga mananagat paghimo og ilegal. Sa pagkakaron, kataw-an lang sa mga illegal fishers ang atong balaod.
Busa angay nang amendahan ug padak-an pa og maayo ang multa ug kinahanglang prisuhon g'yud kadtong mga malapason apil ilang mga agalon.
Apan kinahanglang seryosohon sa gobiyerno ang mga polisiya, enforcement, trainings, research, pagtuon ug pagpalit og mga gamit sa mga tigpatuman sa balaod sa pangisda.
Sa pagkatinuod, daw 'sulagma' kun sila makadakop. Apan kada adlaw nagdaro sa bisan asang bahina sa kadagatan sa Pilipinas kining mga ilegalista.