Dako’ng kalampusan

Sukad pa man kaniadto, talagsa ra ako mobilib sa kapolisan. Kini gumikan usab sa ila’ng mga kapalpakan. Kini wala pay labot sa pipila ka badlongon nga naghatag lamang og bati nga imahe ngadto sa police service.

Apan karo’ng mga panahona, nausab ang ako’ng pagtan-aw kanila. Kini basi usab sa ila’ng mga dagko’ng accomplishment, ilabina sa ila’ng kampanya pagsumpo sa negosyo sa ilegal nga druga.

Sa nangagi’ng mga adlaw, sunod-sunod ang kalampusan sa otoridad sa ila’ng paggukod niadto’ng mga drug pusher ug dealer dili lamang sa siyudad ug lalawigan sa Sugbo apan sa kinatibuk-an sa Central Visayas.

Gani sa nakalabay nga duha ka bulan, dili mominos sa P36 milyones nga balor sa druga ang nasakmit sa otoridad dinhi sa Central Visayas. Kini sumala pa sa rekord sa Regional Police Office-7.

Sa mao’ng rekord, ang Cebu City Police Office maoy adunay labing dako’ng nakuha nga shabu nga mokantidad og P11 milyones. Kudos ngadto sa kapolisan ni’ng dakbayan sa Sugbo sa ila’ng kalampusan.

Gani sa nakalabay nga usa ka semana, hapit sa P5 milyones nga kantidad sa ilegal nga druga ang nasakmit usab sa mga operatiba sa Cebu Provincial Police Office sa nagkalain-laing lugar sa lalawigan.

Niini’ng ila nga dako’ng kalampusan, angay lamang nga ato usab nga pasidunggan ang kapolisan sa Central Visayas. Mao kini ang labing dako nga kampanya sa otoridad batok sa negosyo sa ilegal nga druga sa rehiyon.

Hinuon dili gayud lalim ang paggukod niadto’ng mga nalambigit sa druga. Kini tungod kay dako kaayo nga risgo alang sa kapolisan ang matag operasyon nila batok sa mga pusher ug dealer. Ang nahitabo didto sa Bohol diin usa ka polis ang namatay sa diha’ng misukol ang usa ka drug pusher nagpakita lamang kon unsa ka delikado ang kinabuhi sa usa ka polis matag operasyon batok niini’ng klase sa ginadili’ng negosyo. 

Hinaut nga mopadayon pa kini’ng mao’ng kalampusan sa otoridad. Hinaut nga daghan pa’ng mga drug pusher ug dealer ang ila’ng masikop aron sa ingon nga malimpiyohan ang Sugbo ug rehiyon niini’ng gidili’ng druga.

Hinuon dako kini nga misyon alang sa otoridad. Apan pinaagi sa tabang sa komunidad, dili layo ang dugang pa’ng kalampusan.