Ngano’ng duna pa may mga relief goods?

Pagbuto sa balita nga gikawat ang mga relief goods nga gi-stock diha sa Cebu International Convention Center (CICC), nakapangutana ko sa akong kaugalingon kun ngano nga ang maong mga relief goods wa man mahatod ngadto sa mga nagkinahanglan niini? Unsa man, gahuwat ni’g laing Yolanda?

Despite sa kadaghan na sa mga donation, daghan pa nga mga biktima ang wala pa intawon abti sa mga hinabang. Ug karon, naa pa  diay mga hinabang nga gitanggong lang sa CICC. Ngano man ni? Hangtod hinoon, natental na lang pud ang mga kawatan.

Mao unta kini ang gipanghatag ngadto sa taga-Cebu City Hall nga nabiktima (bisa’g wa’a) sa katalagman, imbes cash assistance nga ta’g P20 mil kada usa, mas maka-save unta ta’g daku-daku.

* * *

Pareho man ‘sab ni sa nahitabo sa mga gi-smuggle nga bugas nga taliwa’a sa pagnihit ug pagmahal sa presyo sa bugas, daghan diay kaayo’ng sinako’ng bugas nga gitanggong sa Customs, nga tungod sa bureaucracy, dili ma-release.

Ang uban niini, lagmit dili makaon, ug bag-o lang nga nakahukom ang gobiyerno nga mahimo na’ng ibaligya ngadto sa private sector. Kun ila pa ni nga gihimo sa sayo pa, makatabang unta ni pagpugong sa kanihit sa bugas.

Apan, as usual, hinay g’yud molihok ang gobiyerno. Apan, sa pork barrel, abtik kaayo.

* * *

Mora man og gihimo na nga negosyo ang pag-file og impeachment complaint. Ambot ngano nga wa’a man ni mahitabo sa una’ng mga administrasyon.

Nagpasabot ba nga walay anomaliya sa nangagi’ng administrasyon? Don’t tell me, hugaw kaayo karon ang present administration, hinungdan nga nagpusot-pusot ang pag-file sa impeachment complaint batok ni Noynoy? Maayo man gani kay sa akong tan-aw, ang kinabag-ang hut-ong sa population, nagpabiling nagpaluyo sa liderato ni Noynoy, kay lagi, wa’a man siya mangawat. Ang atong kabalak-an, kun ang ato unyang ipuli ni Noynoy, dili na mogukod sa mga kiriwan og kamot.

Kining nag-file karon sa mga impeachment complaints, diin man ni sila sa miaging mga administration? Wa’a ba silay nakita’ng kahiwian sa maong mga administrasyon? Limpiyo ba g’yud kaayo sila?

Perhaps, mga demolition pack kini sila’ng tanan. Buot sila nga mapukan ang administration ni Noynoy,  aron dili mapadayon ang paggukod sa mga kurakot sa gobiyerno.

Hinumdom mo, panahon ni Marcos, gidiktahan niya ang tanan: ang Kongreso ug ang Supreme Court. Apan, karon, free kaayo ang Labaw’ng Hukmanan pagpakanaug sa ilang hukom, timailhan nga buhi kaayo ang demokrasya sa atong nasud. Unya, ato siyang i-impeach?