Sigurado nga sa hilom nakasaway si Regional Trial Court (RTC) Judge Soliver Peras sa kapolisan tungod sa ilang kapakyas pagdakop ni Ruben Ecleo nga iyang gisentensyahan kaniadto og pagkabilanggo sa tibuok kinabuhi tungod sa pagpatay sa iyang asawa nga si Alona.
Ambot og tuohan ba kaha sa kapolisan ang awhag ni Judge Peras nga pangitaon nila si Ecleo nga sigurado ko ania ra magtago-tago sa nasud, ilabi na diha sa Dinagat Island nga sakop sa Surigao del Norte.
Dili katuohan nga sa kadaghan sa kapolisan ug sa ilang mga confidential agents dili madakpan si Ecleo nga dali ra kaayo nga mailhan sa iyang dagway, kana kun tinguhaon gayud ang pagpangita kaniya.
Nadakpan lang si Ecleo kaniadto dihang ang regional director sa kapolisan sa CARAGA Region nga si Heneral Alberto Olario maoy nangusog ug mironda sa mansion sa lider sa Philippine Benevolent Missionaries Association (PBMA) didto sa San Jose, Dinagat Islands.
Kun gipaninguha pa sa kapolisan nga madakpan si Ecleo dugay ra unta kini nga nahulog sa mga kamot sa balaod. Daghan kaayo nga mga pamaagi aron matultolan ang iyang gitagoan, ilabi na sa mga moderno nga kahimanan pagka karon.
Imposible nga si Ecleo wala magbaton og cellphone. Kun nagtinil si Ecleo og laptop dihang nabilanggo siya sa Bagong Buhay Rehabilitation Center (BBRC) kaniadto, labaw na nga may laptop siya karon.
Nahinumdom ba kamo sa usa ka international terrorist natultolan man sa mga sakop sa Central Intelligence Agency (CIA) tungod lang sa iyang e-mail bisan og giusab ang iyang ngalan?