Ilara tets!

Kun gusto g’yud si Mayor Michael Rama nga modagsang ang mga pumapalit diha sa Carbon Public Market angay’ng hapsayon niya ang gubot nga merkado ug limpyohon ang mao nga dapit.

Dili maayo nga motuo dayon si Mayor Rama kun ingnon siya ni Market Administrator Raquel Arce nga nindot na kaayo ang Carbon Market kay ang tinuod sa sulti ra g’yud na. Hugaw ug baho gihapon ang Carbon Market. Gubot pa gihapon kaayo ug wala mapatuman ni Arce ang slogan sa mayor nga hapsayon ang gubot ug pahumoton ang baho.

Ngano’ng dili man sila mogamit og fire truck, may fire truck na man ang dakbayan sa Sugbo, aron limpyohan nila ang karsada ug mga kanal nga pwerte’ng daghana’ng mga hugaw ug baho kaayo nga lapok?

Gisuroy man gud nako ang Carbon Market kagahapon kay nakadungog ko og balita nga gusto kuno sa mga opisyal sa dakbayan nga ang mga turista mohugop sa Carbon.

Mohugop g’yud? Aron inigtalikod sa mga turista mamilit ang baho kaayo nga gikan sa mga kanal? Bisan og kaduha lang sa usa ka semana limpyohan ang karsada, kanal ug ang sawog sa merkado moasenso na tingali ang Carbon. Lisod kaayo kun kutob lang ta sa pasiatab nga nindot na ang Carbon Market apan diay sukwahi ang kamatuoran. Dili nato ilaron ang atong kaugalingon.

Bisan ako, gusto ko nga mangompra diha sa Carbon Market kay barato man g’yud ang mga baligya diha bisan og adunay uban nga mga tindera nga usahay mopahimulos usab sa higayon.

Kinaham nako ang mga buwad nga baligya diha. Kuyawan lang hinuon ko kay basin og makapalit ko’g mga buwad nga anaa ra gipainitan uban sa mga basura sa daplin sa Pasil Fish Port. Dili ba tinuod?

* * *

Nindot tan-awon ang gamay nga beach likud nga bahin sa karaan nga Bureau of Customs building nga karon gibunyagan nila og “Malakanyang sa Sugbo.”

Kaniadtong Domingo sa Pagkabanhaw, daghang mga kabus nga pamilya diha ra tawon mangaligo kay dili man sila makaabot nga mobayad sa mahalon nga kaligoan.

Samtang makalingaw na ang pagkaligo diha, apan pasidan-an lang nako ang mga tawo nga hugaw tawon na nga dagat diha. Wala ba kamo magtan-aw nga duol ra kaayo kana sa gitawag og Sitio Bato, Ermita?

Anaa kilid sa Sitio Bato ang hugaw kaayo nga tubig nga nag-agos gikan sa merkado sa Carbon. Basta, dili na lang nako itagsa-tagsa pagsulti kun unsa ang ubang hugaw diha.

Gikuyawan ko nga madaot ang inyong panglawas sa pagkaligo diha. Ayaw pagtuo sa uban nga moingon “parat bitaw ang dagat.”