P7,000 gisugyot alang sa mga SSS pensioners

Si Party-list Rep. Neri Colmenares sa Bayan Muna, kauban sa pipila ka party-list congressmen mipasaka og balaudnon nga magpausbaw sa SSS pension ngadto sa P7,000.00 matag buwan.

Nindot. Hinaut nga ang uban natong mga kongresista ug mga senador, dili magmakuli ini. Tingalig magsupaksupak sila kaylagi magkinahanglan og dakung kwarta pagpatuman ini. Sa mga balaud 9257 ug 9994, kon Expanded Senior Citizens Act of 2003 ug 2010, klaro kaayo nga kinahanglan himoon ang tinuig nga pag-review ug pag-update sa mga pension sa SSS ug GSIS.

Waay nahitabo ini. Mao man gani hinungdan nga magpili unta kita’g kaugalingon nga Senior Citizen Party-list Representative nga Bisdak, aron matagad kining atong mga concerns dinhi.  Matud ni Colmenares, daghan og kwarta ang SSS (labi na ang GSIS), ug kini kwarta sa katawhan. It is but proper nga ang maong salapi mahibalik sa katawhan. Dili kay adto lang punta sa dagku nilang mga sweldo.

Nakita sa COA nga taas kaayo ang interest nga gipatong sa SSS ngadto sa mga sakop nga manghulam … ug kinahanglan mo-refund ang SSS ini. Miabot na kini’g P788.8 million. Kadaku ining kwartaha! Matud sa COA, mikolekta ang SSS sa advance interest nga 18.45 percent, labaw pa kay sa ubang mga commercial banks.

Dugang ini, adunay collectible ang SSS gikan sa delinquent nga mga employers sa kantidad nga P45.6 billion. Kadaghan ining kwartaha. Kon makahatag sila sa refund ug makakolekta sa mga delinquent employers … kadaghan ining kwartaha.

Ug unsay plano sa SSS? Ila konong patas-an ang rate sa monthly premium sa contributions sa mga sakop ini. Misupak sila si Colmenares, ug misugyot hinoon nga usbawan ang pension sa mga retirees.

Mora man og hilom ang uban natong mga Kongresista bahin ining isyoha … lakip na sa kaugalingon natong mga magbabalaud dinhi sa Sugbo. Labi na karon nga bag-o lang natapus ang eleksyon. Sa ato pa, maghuwat na sad ta sa laing eleksyon, una pa matagad kining atong mga suliran sa senior citizens.

Imagine, atong kwarta ang anaa karon sa SSS ug GSIS. Ug ila man lang tang giunay! Unta, ang ilang main concern, mao gayud nga mahibalik nganhi kanato ang maong salapi, in terms of livable pensions ug low interest rates on loans.

Tungod kay atong kwarta, … dili unta kinahanglan nga magpakiluoy kita aron makapahimulos sa mga benepisyo gikan kanila.

Ug ayaw kalimot, paminaw sa Senior Citizens Hour sa dyRC, 648 kHz matag Sabado, 5:00-6:00 pm. Tels. 4125249, 4125298.