Mokagat sa lain

Dear Tito Miguel,

Ako diay si Rajan ,taga Barangay Calamba, Cebu City.  Lima ka tuig nami sa akong girlfriend nga si Shantelle. Bisan unsaon nako og badlong sa akong uyab, kusog jud siya mo-entertain kun dunay mo-flirt niya. Kadaghan na nako nasakpan ang iyang binuhatan. Marupok ra kay ko kay dali rako madala sa iyang sorry.  Basin matudloan ko nimo Tito Miguel ,unsaon nako pagbiya niya nga dili ko matintal nga mobalik niya ? —Rajan

. . .

Rajan,

Matintal gyud ka kun nahigugma pa ka, andam ka modawat, kalimtan ang tanan niya’ng binuhatan. Buta ang nahigugma, mamasin mausab pa. Mingawon ka, ka’y naanad ka nga kuyog mong duha. Pero nangutana man ka unsaon og biya sa wala’y pagbalik, buot pasabot nakahukom na ka mobuwag. Insakto, gani sa primero pa unta ka nibiya. Apan ka’y humok man ka mopasaylo, iyang giabuso.  Aron dili na ka matintal mobalik niya human ninyo’g buwag, hinumdomi pirmi unsa’y rason nganong nibiya ka. Dili siya matagbaw nimo, sa lain mo-entertain. Buot pasabot dili ligdong iyang pagkatawo, nagduwa duwa ra siya nimo. Wala ka niya gihigugma ug gi-respeto.

Wala nimo giklaro giunsa niya’g entertain, sa chat, sa personal o niabot sila sa kama. Kun imong nahibaw-an nga  chat lang ug istorya, buta na ka, tanga pa. Ikaw mismo kahibawo nga sa sugod ra ang istorya. Kun makita sa lalaki nga ang babaye mokagat, ang ending ana ngadto gyud sa kama. Kana ang hunahunaa, aron ka makaamgo wala na ka’y angay balikan pa.

Ipa-andar imo’ng imahinasyon, nga gikilig imo’ng uyab samtang gipalamia’g istorya, nga sila nag-gunit, nag-gakos, nag-hawok, hangtod niabot sa lawak ug katre. Kini tanan iya’ng gibuhat samtang kamo pa. Sa mao’ng paagi lagmit di lang ka maglagot niya, lud-on pa ka.

Siyempre molimod gyud na imo uyab, mopasalig nga wa’y nahitabo kanila, istorya ra. Apan wala’y diperensiya, duna’y nahitabo nga pakighilawas o wala. Ang punto ka’y wala siya matagbaw nimo, busa magkonsumisyon ka kun magpadayon mong duha.   —Tito Miguel

Magpatambag ka? Ipada kang Tito Miguel: 0991-318-9366