Pagbuhos sa gibati

Gula 117

Samtang naghilak si Erica anaa diay si Otoy sa hilit nga dapit sa ilang balay naghilak usab nabati ni Erica ang pagbakho ni Otoy. Gilingi niya kini nakita niya ang mga luha sa manghud nga nagtan-aw kaniya tungod sa kaluoy niya sa maguwang miduol kini kang Erica ug migakos.

"Ate  husto na barog Ate," ni Otoy nga gialalayan si Erica pagpabarog.

"Wala ko pangandoya ning kinabuhia... nagpakaulaw ko aron mahatagan ko'g maayong  kaugmaon kamong akong mga manghod  gibuhat ko lang ang akong responsibilidad isip  maguwang aron dili mo malunosan sa kagutom... apan nganong dili ka man makahibawong  mosabot, Lenny? Nga alang ra man ni ninyo  akong gibuhat?...Ikaw dong nakasabot ka  nako?..nakasabot ka nako?" matud pa ni Erica.

"Oo ate nakasabot ko," matud pa ni Otoy "sige  dapigi nang imong igsuong puta," matud pa ni Lenny ug milingi si Otoy kang Lenny, "pero mikaon ka sa pinutahan sa atong maguwang?" maisugong tubag ni Otoy ngadto ni Lenny. "Kun mahimo pa lang isuka nako tanang pagkaon nga iyang gipalamoy nato kun mahimo pa lang muhanggab ko'g hangin aron katambalan ang kagutom, kun mahimo pa lang mukaon ko'g yuta,  dugay ko ra unta nang gibuhat," matud pa ni Lenny.

"Ayaw paghinipokrita kaugalingon lang nimo ang imong gihuna-huna wa kay kalooy sa atong maguwang nga maoy naningkmaot para nato kanus-a man ka makasabot? Ingon na ba lang gyud niana kasalbahis ang atong maguwang aron pasakitan mo'g sama niini? Ayaw ihan-ok ni ate ang nahitabo sa atong pamilya igo lang siyang naningkamot kay kita ang iyang gihuna-huna. Kun  gikapoy kana  ayaw paglamoy sa kinitaan ni Ate. Kun gikapoy kana  undang sa imong pag-eskuwela diin si Ate maoy nabuktot ug napuno sa pagbiaybiay sa mga tawo ayaw na pagkaon sa pagkaon gikan kang Ate," pintok apan may luha ang mata nga miatubang kang Lenny. Mihilak si Lenny daling mitalikod ug mipaingon sa kuwarto. Misamot ang pagbakho nga migakos kang Otoy si Erica gipalingkod sa manghod ang maguwang sa lingkuranan giam-aman. Gipa-inom og tubig human mahuwasi gikuha  ni Otoy ang mga gamit ni Erica aron mopadayon sa iyang lakaw. Miingon pa si Otoy kang Erica nga bisan gamay walay pagdumot nga iyang gibati para sa maguwang. Hinuon nahimo niya kining idolo giingnan pa nga dili panumbalingon ang mga tabian nga way mahimo gawas sa pagpanglibak kay dili sila makaabot sa ilang padulngan. Human makapasalamat si Erica sa manghud migawas kini sa ilang balay gibaktas ang dalan diin maagian niya ang mga silingan nga nag-iyahay sa paghinunghongay. Sa hunahuna sa babaye kinahanglang lig-unon pa niya ang iyang kaugalingon ug dili magpadala sa libak sa silingan.

Pila na lang ka buwan mogradwar na si Erica sa high school ug plano niini nga mueskwela gyud sa college. Si Melche ug Andy maoy iyang kasumbungan sa tanan niyang mga kahiubos sa ila. "Mas maayo siguro nga mag-abang kana lang og usa ka kuwarto Erica," suhestiyon pa ni Andy.

"Bitaw day mas maayo nang suggestion ni baby Andy sige day mangita ta'g kaabangang kuwarto kana lang barato. Mag-ipon ta sa pagpuyo magtunga ta sa abangan. Gikapoy na sad ko sa ato oy madugay ko'g puyo anang atong dapit makapatay ko," matud pa ni Melche.

"Sige  ugma Domingo man tabangan ta mo'g pangita'g kapuy-an  unsa man Erica, uyon ka?" ni Andy pa "sige mas maayo siguro nang inyong nahuna-hunaan," matud pa ni Erica. Tuod man pagkaugma niana way langay nangita sila'g gamay'ng kuwarto nga ilang kaabangan may nakita sila nga duol ra sa trabahoan ni Erica. Bug-os na ang hukom sa dalaga mobalhin na kini'g puyo. Nahakot na sab niya ang iyang mga gamit agi'g respito sa mga manghud nananghid siya. Si Lenny lang ang wala gyud motimbaya gi-snoban pa siya niini.

"Pasagdi lang kada semana mag-anhian ko aron maghatud sa inyong kunsomo isaad nako nga dili ko kamo pasagdan bahala na'g mabuktot ko'g trinabaho basta makatapos pud mo sa inyong pagtuon," matud pa ni Erica. (Sumpayan)