Ma, ayaw ko’g biyai

Gula 105

“Unsa to oy? Imong ihatud sa ila si Erica ug makigsulti ka sa iyang mama? Dah mao na gyud ni basta mahigugma na ang tawo unahon gyud pagpangulitawo ang ginikanan ang pamilya. Bongga ka bayot formal nang magpaila si baby Andy sa imong mama sultihan dayon ni baby Andy si nang Minda nga...ma'am, ako si Andy ang lalaking nahigugma sa inyong anak nga si Erica. Ug hinaut nga tabangan ko ninyo nga sugton ko ni Erica. Gimahal ko siya labaw pa sa akong kinabuhi.

Andam kong ibuhis ang akong kinabuhi lamang maangkon ko ang kasing-kasing sa babaye nga natingban sa tanan. Ipaniguro ko ninyo nga dili ko pasakitan ang inyong anak. Hatagan ko siya’g kalipay dili pahilakon sama sa inyong gibuhat kaniya. Dili ko siya isalikway sama sa inyong gibuhat kaniya tinggan ko siya kanunay dili sama sa inyong gibuhat kaniya nga mura’g tawo-tawo sa kahumayan dinhi sa inyong panimalay. Mura’g wa mo-exist sa inyong panan-aw,” matud pa sa bayot nga nagdrama.

“Pasabton ko lang ang mama ni Erica kun nganong pilit nga misulod sa maong trabaho ang ilang anak. Mohangyo ko nila nga dili nila tratoho’g laing tawo si Erica,” matud pa ni Andy.

“Pak-pak pang best actor ang akong baby Andy!” matud pa sa bayot nga mipak-pak.

“Ayaw Andy  ayaw pag-uban kanako ngadto sa among panimalay. Ayaw na lang pag apil-apil,” pagdumili ni Erica sa gusto sa ulitawo. “Ana man gyud nang mahigugma oy, apil-apilon kaayo bisag way labot. Mao nay gitawag tungod sa gugma manginlabot. Dili na panghilabot kang baby Andy day panginlabot nang iyaha. Gugma gud concern ipakita man gyud nang pagkasensiro sa tawong nahigugma ngadto sa tawong iyang gihigugma. Di ba baby Andy?” matud pa sa bayot.

“Sige na Andy, pauli na please tumani ko sa akong gusto,” paghangyo pa ni Erica. Tungod sa dakong gugma ug respito ni Andy sa babaye nga inanay na niyang gihigugma mituman kini sa gusto sa babaye.  Human makapalayo ang awto ni Andy, mipauli usab ang duruha sa tagsa-tagsa niini ka panimalay. Sa huna-huna sa babaye dihang nakasulod na kini sa ilang balay sagubangon na sab niya ang mga dili maayong pagtagad sa iyang mama kaniya.

Pero bisan na padayon gihapon siyang magpakita’g gugma ug respito sa inahan. Sa gihapon sa dili pa matulog lantawon ug hagkan niya ang inahan samtang nahinanok kini sa pagkatulog. Mulitok og pipila ka pulong sa gugma ngadto sa inahan apan hinay aron dili matukaw sa iyang pagkatulog ang masakiton niining inahan.

“Kanus-a man ko nimo tinggan ma? Kanus-a man ka makasabot sa akong gibuhat? Kanus-a ka man tugkan og kaluoy nako? Kanus-a ka mutuo nga tinuod ang tanan kong gisulti nimo nga wala ko mamaligya sa akong pagkababaye sa club? Nga igo lang kong mosayaw sa entablado? Mahal ta kaayo ka ma ikaw ang labing importanteng tawo sa akong kinabuhi. I love you mama Minda,” ni Erica pa nga mihalok sa aping sa inahan. Hinay nga gihapuhap ang agtang niini apan nakabantay si Erica nga may luha nga inanay nga miagas gikan sa mata ni nang Minda. Sa nakita sa babaye nagduda kini nga nagmata ang inahan ug nakabati sa iyang gipamulong. Mipadayon sa pag-ingon ang babaye, “kun nakabati ka man nako karon ma mao ni timan-i nga mahal kaayo tika.

Gusto ka bang moundang na lang ko sa akong pagtrabaho? Sultihi ko ma kay buhaton ko na ang tanan mong gusto lamang imo na kong tinggan ug ibalik mo ang kanhi mong maayong pagtagad nako,” ni Erica pa nga kalit na-rattle tungod sa nakitang hitsura sa inahan nga ingon og nagping-it samtang may luha ang mata, “Ma? Unsay nahitabo nimo? Ma…” si Erica nga nagkabuang apan sa kalit lang miginhawa og lawom kaayo si nang Minda. Wa magtuo ang babaye nga mao kadto ang kataposang paginhawa sa iyang inahan. Giuyog ni Erica ang lawas sa inahan.

Pilit nga gipamata apan wala na kini maglihok. Gihimulsohan ni Erica si nang Minda apan wala na kini magpitik. Patay na si nang Minda nakuhaan na usab og usa sa nahimong inspirasyon ni Erica aron maningkamot. Miluom sa paghilak si Erica samtang naggakos sa inahan. Tungod sa paghilak ni Erica nang-mata ang tanan niyang igsoon.

“Ma!! Mama Minda, ayaw intawon mi’g biyai, nagkinahanglan pa mi nimo ma... mama Mindaaaaa!!” pagtuaw ni Erica samtang giyugyog ang lawas sa inahan nga wala nay kinabuhi. (Sumpayan)