EDITORYAL - ASG labad sa ulo

Nabutang karon sa tumang kauwawan ang Pilipinas tungod niining nahitabong pagpunggot sa mga bandidong Abu Sayyaf sa usa sa ilang mga Canadian hostage didto sa Jolo.

Dili kini kataw-anan o simpleng problema kay ang nalambigit langyaw man nga nasud nga kaalyado usab sa Pilipinas ug labaw sa tanan nakapusta niini ang imahe sa nasud. Ang pangutanang kanus-a pa kaha matapos kining tanan mag-agad sa kung unsa kalig-on sa baruganan ang mosunod nga presidente sa nasud nga motutok gyud niini. Trabaho sa atong kapolisan ug sa militar ang pagsikop sa mga bandido ug pagluwas sa mga hostages apan dili nila kini mahimo kun wala silay mga modernong gamit.

Sa pagkakaron, naninguha ang kasamtangang gobiyerno nga bisan sa ginagmay nga paagi napalitan og gamit ang kapolisan ug militar, apan kinahanglan nga ipadayon kini sa sunod nga presidente.

Kini aron sa ingon, di na kaayong magsalig sa impormasyon gikan sa komunidad nga klaro kaayong adunay mga kaliwat ang mga bandido.

Usa sa mga rason nganong di ni sila mahurot ug kapin sa 20 na ka tuig silang naghasi diha sa gagmay lamang nga isla sa Basilan ug Jolo, kini tungod kay dako kaayo ang ilang impluwensiya sa mga komunidad. Aduna sila’y mga kaliwat sa matag lungsod nga mahimo nilang katagoan ug mohatag kanila og impormasyon mao nga lisud gyud alang sa mga otoridad nga matultolan sila ug mapuo.

Husto ang gibuhat karon sa gobiyerno nga pagbubo og daghang imprastraktura, panginabuhian, edukasyon, batakang serbisyo sa maong mga komunidad.

Tinuod di awtomatikong mahunong kini, apan kinahanglan lang og pailob kay moabot ra unya ang panahon nga mapuo ang mga bandido kun ang katawhan matagbaw sa serbisyo sa gobiyerno.

Pinaagi lamang niini, maputol na ang kakabos sa maong dapit nga gihimong rason sa uban aron maghimo og dautan.