Salaod na ang dili pag-atiman sa katigulangan

Si Kongresista Alfredo D. Vargas sa Quezon City mi-file niining maong balaudnon (HB 6460) nga iyang giulohan og “Care for the Elderly and Disabled Act.

Ang tumong niini aron pagsiguro nga atimanon gyud ug dili kay pasagdan na lang ang katigulangan sa ilang mga pamilya, apil na ang mga tawo nga adunay kakulian sa panglawas.

Tumong ning maong balaudnon mao nga kun mahimo na nga balaod, ang mga gipasagdan nga katigulangan ug mga disabled, dili na maabandonar ug kahatagan na sa tukmang pag-amona ug pag-atiman.

Ang dili pag-atiman sa katigulangan ug mga PWDs giisip nga usa na ka criminal neglect nga nagtangag og silot pagkabilanggo sa dili mominos usa ka tuig apan dili molapas lima ka tuig, uban sa multa nga dili mominos P10,000, apan dili molabaw og P100,000.

Bug-at sab ang silot busa dili maayong i-ignore. Matud ni Vargas, vice chairman sa Committee on Health ug sa Social Services, ang estado mihatag og dakong pagtamod sa dignidad sa tawo, ug mitahod sa mga tawhanong katungod niini, busa dili angay ug dili makiangayon nga pasagdan ang katigulangan ug mga PWDs.

Gipahimangnoan ang mga caregiver, sa dili pagpabaya sa ilang mga katungdanan ngadto sa katigulangan ug mga PWDs, aron dili sila kasilotan sa maong pagpabaya.

* * *

Ang DSWD nangayo og dugang budget, aron dugang indigent senior citizens ang makadawat sa P500 nga hinabang matag buwan.

Nangayo sila og P7.51 billion, ug lagmit nahatag na kini ngadto kanila, ug gipaabot nga maka-serve na sila og 1,182,941 ka indigent senior citizens karong tuiga. Sa tuig 2013, ang ilang budget P1.53 billion ra, ug 255,763 ra ka senior citizens ang naalagaran.

Sa tuig 2014, sa budget nga P2.9 billion, 403,284 ra ka indigent senior citizens ang nakadawat sa tag P500 nga pension. Gawas sa ilang social pension program alang sa mga senior citizen, ang DSWD, nagpadagan usab og upat ka residential care services, nahimutang sa Quezon City, Rizal, Davao City, ug Zamboanga City. Walay Cebu.

Ang maong residential homes nag-atiman sa katigulangan nga gipasagdan ug giabandonar sa ilang mga pamilya. Sa gipangayo nila nga usbaw sa budget, gawas nga makadugang sila sa gidaghanon nga beneficiaries, ila usab us-osan ang eligible age gikan sa 77 ngadto sa 65.

Sa ato pa, mas daghan na unya nga mga indigent senior citizens ang kaalagaran. Hinoon, dili kita makapaabot nga kausbawan ang pension ngadto sa tag P1,000 gumikan sa kalimitado sa budget. Magkinahanglan tingali og P15 billion. Asa man ta mangahoy niini?