May gitago ang kangitngit

Kay wala man g’yud motingog sa pikas linya, gibutang na lang ni SPO1 Nicko Bernal ang iyang cellphone.

Gibuhian niya ang usa ka halawom nga panghupaw. Nakapangutana siya sa iyang kaugalingon kun kinsa man kaha kadtong nanawag nga dili man motingog kun iyang pakigsultihan.

Apan nahawan ang gibati ni Nicko diha nga misantop sa iyang hunahuna nga basin gibinuangan lang siya sa mga wala’y lingaw. Maoy ilang kalingawan ang telepono pinaagi sa pagdayal sa bisan unsa nga numero.

Apan ang nakapahibulong ni Nicko kun ngano nga upat ra man ka numero sa telepono ang nanawag? May telepono ba gud nga ingon niini karon? Mao nga gihakop karon si Nicko sa tuman nga kalibog.

Mitarong si Nicko sa paglingkod. Gipaliraw niya ang iyang mga mata sa palibot sa iyang opisina. Misangko ang iyang panan-aw sa libro nga itom ang hapin nga giingong maoy doktrina sa Bangkulis Black Brotherhood.

Iya nga gikawhat aron ipadayon ang pagbasa niini kay namasin siya nga may makuha pa nga kasayoran nga makahatag kaniya og giya sa pagsulbad sa kaso nga pagpatay sa tulo na ka bata nga pareho’ng natawo sa Septiyembre 8. (Sumpayan)