Panghudlat sa maid
Subra bayente anyos na kong praktis sa akong pagkaabogado, wa gyud ko kasuway og himo og kasabutan tali sa amo ug maid!” ni Atty. Rex Satolis sulod sa iyang bupete.
Nag-atubang siya ni Mercy, iyang pag-umangkon nga naglingkod atbang niya sa lamesa. Magpahimo gyud si Mercy og dokumento nga kasabutan sa maid, karong buntaga.
“Himoi lang ko, Uncle. Unya notaryohi daan” ni Mercy nga wa gyu’y kalibutan sa balaud. Gamiton iyang uyoang abogado sa pagpanghudlat og maid. “Dili na angay buhatan og kontrata uy! Trayenta anyos na kong minyo. Pila na ka maid nanglabay sa among kamot sa akong kapikas. Wa man gani ko maghimo og kontrata nga abogado ko. Ikaw pa?” ni Rex. “Kun akong dad-on dinhi si Melody among bag-ong maid? Papirmahon sa imong atubangan?” ni Mercy. “O sige. Pero gaduda kong di na moari. Mahadlok na. Ug di na hinuon mopadayon og serbisyo ninyo,” ni Rex. “Mao ba, Uncle?” ni Mercy.
“Ang maid, ayohon lang nimo’g tratar. Baoran nimo sa di nimo gusto. Hatagan sab nimo sa pipila nila ka gusto. Sama sa day-off ug emergency nga mga lakaw. Molutaw nga ngil-ad og kinaiya ang amo nga magpahimo og kontrata sa maid,” ni Rex. Nanglipaghong si Mercy.
“Pananglitan, himuon nato. Unom ka buwan ang tagal. Unya kun di siya ganahang mohuman sa unom ka buwan, kutob ra’s tulo, ipapriso nimo? Di man na mahimo. Pabayron nimo’g danyos? Unsa may ikabayad? Nagpa-maid man gani na kay way kuwarta?” ni Rex.
Nalamdagan si Mercy nga ang pagpabut-an sa maid, ayohon lang gyud og tratar. Dili dokumento nga kasabutan ang solusyon. (Kataposan)
- Latest