Yap mipakitang gilas sa Rain or Shine

CEBU, Philippines - Milusad og nagkayong opensiba si James Yap aron paggiya sa bag-o niyang team nga Rain or Shine ngadto sa duha ka sunod-sunod nga daog sa 2017 PBA Commissioner’s Cup batok sa NLEX ug Mahindra.

Giablihan sa 6-foot-2 nga si Yap ang iyang kampanya uban sa RoS  pinaagi sa pag-average og 19.0 points ug 3.0 rebounds matag duwa hinungdan sa pag-angkon niya sa labing unang Accel-PBA Press Corps Player of the Week ning komperensiyaha. Iya gipukan alang sa maong pasidungog sila si Baser Amer ug Chris Newsome sa Meralco.

Ang 25-anyos nga si Yap mipabuhagay og 26 puntos nga maoy labing taas niyang iskor sud sa kapin sa tulo ka tuig  aron silyohan ang ilang 113-105  nga daog batok sa NLEX.

Duha ka adlaw ang milabay, si Yap mikadlit og 12 puntos apil ang tulo ka tres sa dihang nakaipsot ang Rain or Shine batok sa Mahindra, 99-95.

Sa pagka karon, ang Rain or Shine mopahuway una og usa ka semana sa dili pa mobalik sa aksiyon karong Domingo batok sa Blackwater didto sa Ynares Center sa Antipolo. (BANAT NEWS)