Gobert gi-trade sa Jazz, lavine gihigtan sa Bulls
CEBU, Philippines — Ang Utah Jazz miuyon nga i-trade ang pambato nilang sentro nga si Rudy Gobert ngadto sa Minnesota Timberwolves samtang si Zach LaVine nagpahigot sa Chicago Bulls pinaagi sa lima ka tuig nga kontrata nga mibalor og $215 million.
Sigun sa taho sa ESPN nga si Gobert, nga tulo ka higayon gibayaw nga Defensive Player of the Year, motikang sa Minnesota puli nilang Malik Beasley, Patrick Beverley, Jarred Vanderbilt, No. 22 draft pick Walker Kessler ug upat ka first-round NBA Draft picks.
Ang 30-anyos nga sa Gobert miduwa sa tibuok niyang siyam ka seasons sa NBA uban sa Jazz. Sa maong mga panahon, iyang gitabangan ang iyang koponan nga makasud sa playoffs sud sa unon ka sagunson nga tuig. Mi-average siya og 15.6 puntos, 14.7 rebounds ug 2.1 blocks sa miaging season.
Sa Minnesota, makauban ni Gobert ang laing dekalibreng big man nga si Karl-Anthony Towns, nga miuyon nang lugwayan sa Wolves ang iyang kontrata ngadto sa upat ka tuig sa kantidad nga $224 million.
Sa lain pang mga kasikas sa NBA free agency, si Devin Booker magpabilin sa Phoenix Suns pinaagi sa upat ka tuig nga kontrata nga mibalor og $224 million samtang si Ja Morant gipaabot nga mopirma og lima ka tuig nga contract extension uban sa Memphis Grizzlies nga nagkantidad og $193 million.
Si Jusuf Nurkic mopilit sa Portland Trail Blazers luyo sa upat ka tuig nga kontrata nga mibalor og $70 million, si John Wall misang-on sa duha ka tuig nga kontrata nga nagkantidad og $13.2 million aron moduwa sa Los Angeles Clippers, si Mitchell Robinson nagpahigot sa New York Knicks pinaagi sa upat ka tuig nga kontrata nga nagkantidad og $60 million, samtang si Gary Payton II mobalhin sa Portland kortesiya sa tulo ka tuig nga kontrata nga mibalor og $28 million.
- Latest
