Pambato sa Carmen, Liloan nanghawod sa Divine Mercy duathlon

CEBU, Philippines — Sila si AJ Pasana ug Kent Quiros sa Carmen, Cebu midominar sa tagsa-tagsa nila ka mga dibisyon sa Divine Mercy Duathlon Short Course Challenge nga gipahigayon niadtong Nobiyembre 30 didto sa Awihao, dakbayan sa Toledo.

Si Pasana, Grade 7, ug Quiros, senior high student, sa Carmen National High School maoy milugwa nga kampiyon sa junior 13-under ug 18-under category.

Si Christian Vince Cogtas sa Cebu City mitapos sa ikaduhang dapit samtang si Jherix Ocno sa Talisay City mipahiluna sa ikatulong puwesto sa 13-under class.

Ang top 10 finisher sa Cebu Cross 600 nga Russel Ermac mitapos sunod ni Quiros samtang si Keith Michael Reducto sa Mandaue City ang na-3rd sa 18-under.

Mihimo sab og kasikas si Khaiser Randolf Lee sa Liloan human gilangkat ang titulo sa junior 16-under age group. Nagsunod kaniya sila si Sumiso Basalan sa Naga City ug Axel Shane Basaca sa Consolacion nga mi-okupar sa ikaduha ug ikatulong dapit.

Ang garbo sa Toledo nga si Jhelro Mamalias maoy nanghawod sa seniors division. Si Brijan Manatad sa Mandaue ang na-2nd ug gisundan kini ni Lenmar Monares sa Balamban.

Lain pang mga mananaog mao sila si Danielle Recafrente sa Pinamungajan, Kaye Alvez sa Daanbantayan, Jhayra Cabuena sa Talisay ug Yona Dela Calsada sa Minglanilla.   

Ang tinamod nga Sugbuanong businessman/sportsman nga si Lorenzo "Chao" Sy sa La Fortuna Group ug Bro. Julius Poloyapoy maoy nangu sa awarding ceremony sa makutas nga lumba nga gipaluyohan sab sa EMF Game Farm.