Kapin sa 1,000 ka TDC scholarships gihatag sa LTO-7

CEBU, Philippines — Sobra sa 1.000 ka Theoretical Driving Course (TDC) scholarships ang gihatag sa Land Transportation Office (LTO)-7 ngadto sa mga residente sa 12 ka bukirang barangay sa Dakbayan sa Sugbo.

Matag barangay kapitan sa bukirang bahin sa siyudad gihatagan og 100 ka slots sa LTO alang sa mga gusto nga mokuha sa TDC scholarship.

Diha sa Barangay Sudlon I, 200 ka residente ang nakakuha og TDC atol sa “Serbisyong Malasakit on Wheels” caravan niadtong Oktubre 20 ug 21.

Gawas sa Sudlon I, apil sa gihatagan og slots alang sa TDC mao ang Barangay Agsungot, Busay, Babag, Bonbon, Sinsin, Sirao, Pamutan, Tabunan, Pung-ol Sibugay, Taptap, ug Toong

Ubos sa LTO Memorandum 2019-2176 tanang aplikante sa student permit kinahanglang mopaubos kini 15-hour TDC.

“We brought to the highland barangay, our LTO Malasakit Bus to also cater for license and registration renewals, where normally they have to avail of this service in the metro areas”, matud ni Victor Caindec, direktro sa LTO-7.

Dugang ni Caindec nga 11 pa ka laing mountain barangay sa siyudad ang sunod nga makabenepisyo sa maong programa. BDB (BANATNEWS)