PDEA-7 padayong nag-monitor batok sa pagpalusot sa ilegal nga drugas

CEBU, Philippines — Gibutyag sa Philippine Drug Enforcement Agency (PDEA)-7 nga padayon ang ilang pag-monitor sa pagpalusot og drugas nga ecstacy dinhi sa Central Visayas.

Kini human na-intercept sa mga tinugyanan sa balaod ngadto sa Ninoy Aquino International Airport (NAIA) ang parcel nga gideklara nga dog ug cat food apan diay 40,000 ka tabletas kini sa party drug nga ecstacy nga nagkantidad og P70 milyones.

Matud ni Intelligence Agent III Jonar Cuayzon, pangulo sa Intelligence and Investigation Section sa PDEA-7 nga hagit sa mga law enforcer ang sama niining klase sa drugas tungod kay dili kini pareho sa shabu nga ilado na kaayo bisan pa sa mga suok nga mga lugar.

“Kana siya gud limited ang iyahang network, na limited siya didto sa mga upper class nga mga tawo mao na ang ato pod dapat informant ana mostly kato pod naa ra sa ilang circle which is naglisod ta og recruit ani nila kay unsa may i-offer sa law enforcement nila, they need money naa man sila'y kwarta, unsaon man nato pag-encourage nila nga mo report, unya dili siya ingon nga lantaran gyud nga ibaligya og asa dapit then naa sila’y usually naka-hub sila exclusive subdivision, condominiums nga naay mga security protocols nga gina-enforce diha nga maglisod gyud ta basta-basta og sulod anang establishment”, padayag ni Cuayzon.

Apan matud sa opisyal nga ang law enforcement agencies sa Central Visayas nagtambayayong aron malikayan nga makalusot ang nahisgutang klase sa ilegal nga drugas ilabi na karon nga aktibo na ang turismo daghan na og party ug gipanglantawan nila  nga aduna gyu’y mamaligya sa maong matang sa ilegal nga drugas.

Base sa report sa PDEA-7 nga ang ecstacy mapalit sa presyo nga P1,800 kada usa ug gingong tungaon ang tabletas aron ihatag sa uban sa dili pa kini imnon.

“Kaning ecstasy naa siya'y lain-lain nga effect, naay uban kanang murag intense kaayo imong lawas unya lami kaayo isayaw and then naa poy mga uban ani mga sex enhancer, naa siya’y mga klase-klaseng effect pod sa lawas and then pag ma-overdose pod ka ani mo-cause ni siya og palpitations ug dili makaya sa imong heart mao toy giingon nato it will result to death”, padayag ni Cuayzon. (BANAT NEWS)