Rubber granules sa CCSC gisugdan na sa pagpamutang

CEBU, Philippines — Gisugdan na ang pagpamutang sa rubber granules diha sa Cebu City Sports Center samtang ang ubang  mga empleyado ang namintal kini sa grandstand ug sa ubang mga lugar aron bag-ong tan-awon ang pasilidad nga gamiton sa ipahigayong Palarong Pambansa 2024 karong Hulyo 9 ngadto sa 17.

Sayo pa, ang contractor nisaad sa pagbutang sa rubber granules human sa pagpahigayon sa Central Visayas Athletic Association.

Apan human sa pagbutang og aspalto alang sa pagpalig-on ug suporta sa track wala nay nahimo hinungdan sa dugang nga pagkalangan.

Ang pagkasuspenso ni Mayor Michael Rama nidugang sa kabalaka sa kadaghanan lakip sa Department of Education apan si Acting Mayor Raymond Alvin Garcia nipaniguro  ngadto kang Regional Director Salustiano Jimenez nga dili angayang mabalaka diin gihimo nila ang tanan aron mahimong malamposon ang Palaro. Si Jimenez atol sa iyang pakigtagbo kang Garcia nipadayag nga ang oval kinahanglang mahuman na diin mao kini ang usa sa hinungdan nga ang Cebu City ang nidaog sa bidding sa Palaro.

Human sa mga kabalaka, ang rubber granules napahimutang na kini. Nasayran gikan sa usa sa mga nagdumala sa construction work nga si Bernard Ricablanca nga niadtong Sabado pa nagsugod ang pagtrabaho sa rubber laying.

Ang gitrabaho karon mao ang D section o ang sulod nga bahin sa oval nga gamiton alang sa mga kalihokan. Ang pikas bahin sa D nga section alang sa mga hurdle.

Human sa base granules, laing set sa granules ang ibutang sa ibabaw matud ni Ricablanca.

Nanghinaot si Ricablanca nga ang contractor motrabaho lakip sa gabii aron matapakan ang mga nalangan nga oras ug mahuman na dayon ang proyekto. —The Freeman