Mga mag-uuma sa Camotes giawhag pagtanum og yellow corn

CEBU, Philippines — Personal nga gipakigkitaan ni Cebu Governor Gwendolyn Garcia ang mga landowners ug mga farmers sa Camotes island aron kumbinsihon nga mobalhin na sa pagpananum og yellow corn, nga mao karon ang in demand.

Atol sa consultative meeting uban sa 450 ka landowners ug farmers sa San Francisco, giklaro ni Governor Garcia ang mga maayong kahigayonan sa yellow corn production nga maoy in demand alang sa paggama og feeds, chips, ug ubang produkto.

Dili mominus sa 20 ka institutional buyers ang nakig-partner sa Kapitolyo lakip na ang Prifoods Corp., Universal Feed Mill Corp., San Miguel Foods Corp., Vienovo Philippines Inc., General Milling Corp., Pilmico Feeds, ug Central Visayas Pork Producers Cooperative ug uban pa.

Kining maong mga institusyon adunay kinatibuk-ang demand sa yellow corn nga moabot og 426,400 metric tons matag tuig base sa data gikan sa Provincial Agriculture Office.

Apan ang Sugbo igo lang maka-supply og dili kaabot og 1 percent sa maong gidaghanon hinungdan nga mapugos ang maong mga institusyon sa pagkuha sa ilang yellow corn requirements gikan sa ubang probinsiya sama sa Mindanao.

Nasayran ang Pilar ug ang kinatibuk-ang Camotes island, haum alang sa pagtanum og yellow corn ug kini mahimong itanum tibuok tuig nga wala kaayo magkinahanglan og irigasyon.

Ang mga representatives gikan sa lain-laing kompaniya nga mitambong sa consultative meeting ang mipasalig nga mopalit sa tanang yellow corn nga ma harvest sa mga farmers sa dapit.

Ang mga opisyales gikan sa Department of Agriculture ug sa Philippine Crop Insurance Corp. (PCIC) ang mitambong usab sa maong tigum.

Gawas niini mohatag usab og financial assistance ang mga lending institutions alang niadtong interesado sa yellow corn production.

Gidala usab ni governor Garcia ang mga lending institutions sa Land Bank of the Philippines, nga mitanyag og 2 percent interest rate, ingon man ang Cooperative Bank of Cebu, nga mitanyag og zero interest rate.

Ang Kapitolyo mo-indorso sa mga farmers nga interesado nga mohulam og capital gikan sa maong mga institution alang sa paspas nga proseso sa application ug sa pag-release sa ilang loan pinaagi sa Capitol’s Enhanced Countryside Development o ECD program.

Si Governor Garcia mipasalig sa padayon nga paghatag og assistance sa mga farmers nga mobalhin na sa pagtanum og yellow corn, sama sa technical aid nga ihatag sa Provincial and Municipal Agriculture Offices. —Gikan sa The Freeman,MEL  BANAT NEWS