Pagpalit og gamit alang sa palarong pambansa gipahunong
CEBU, Philippines — Gipahunong una ni Cebu City acting mayor Raymond Alvin Garcia ang procurement order kun pagpalit sa mga ekepo ug sa mga serbisyo alang sa Palarong Pambansa aron maseguro nga nahasubay kini sa budget ug walay nahitabong trampas sa proseso.
Gipahibawo ni Garcia nga gumikan sa mga komento sa ubang tawo ingon man sa pipila ka mga konsehal sa siyudad gimando dayon niya ang “immediate suspension” sa procurement activities alang sa paghost sa Palarong Pambansa 2024.
Usa sa gitumbok ni Garcia ang portalet rental nga miabot sa P21.9 milyon nga gihulagway niini nga hilabihan ka dako nga unta abangan ra man kini ug dili man mapanag-iya sa siyudad.
Apil usab nga ipasusi sa acting mayor ang tanang nalambigit sa procurement process aron maseguro gyud nga walay problema nga masugatan.
Gipaneguro ni Garcia nga tulo ka adlaw mahuman na niya og susi ang tanang dokomento bahin niini og nga dili maapektohan ang pagpangandam sa pagpahigayon sa Palarong Pambansa.
Samtang gibisita ni Garcia ang Cebu City Sports Center human gikatahu nga wala pa masugdi ang pag-trabaho sa track oval. Gumikan niini gimanduan niya ang kontraktor sa paghuman sa ilang trabaho sa tukmang panahon aron seguradong magamit sa dakong kalihukan sa paugnat sa kusog sa nasud. (BANAT NEWS)
- Latest
