Upat ka kawani sa City Hall nahatagan na sa ilang sweldo

CEBU, Philippines — Hingpit nang nadawat sa upat ka empleyado sa Cebu City Hall ang ilang nahibilin nga unom ka buwan nga suholan nga maoy hinungdan sa pagka suspenso ni Mayor Michael Rama ug laing pito ka mga opisyal ug gibalik usab sila sa karaan nga assignment sa City Assessor Office.

Kini ang gipahibawo ni Acting Mayor Raymond Alvin Garcia sa press conference kagahapon, Mayo 20, 2024.

Una niini si Garcia niadtong miaging semana nimando sa dinalian nga pag-release sa suhulan ug sa approval sa resolution sa konseho atol sa regular session niadtong Miyerkules sa miaging semana.

Ang City Council niaprobar niadtong March 15 sa resolution ni Konsehal Noel Wenceslao nga maggahin ug pundo alang sa maong suholan sa mga empleyado.  Kauban ni Garcia sa samang press conference ang upat ka complainants, nga sila si Filomena Atuel, Maria Almicar Diongzon, Sybil Ann Ybanez, ug Chito Dela Cerna, kinsa mikompirmar usab nga na-release na ang ilang sweldo. “Lo and behold kaya man diay nato i-release ang kwarta og one week,” suma pa ni Garcia. Usa sa mga kawani nga si Diongzon, mitug-an sa mga reporters nga niadto pang Biyernes nila nadawat ang ilang nahibilin nga unom ka buwan nga sweldo gikan sa July 2023 ngadto sa December 2023.

Subay niini gipasalamatan ni Garcia ang Cebu City Council gumikan sa approval sa resolution nga maoy hinungdan nga nadali ang pag-release sa suhulan. “Humana ang atong kalbaryo para ani nila, they can finally, you know move on, dili na nato ni i-pass on, they can finally move on thinking human na gyud, nabayran na gyud ang ilahang back wages,” dugang ni Garcia.

Sa samang adlaw human sa media briefing, si Garcia opisyal nga nipirma sa recall order sa upat ka kawani ngadto sa ilang mother unit, sa Cebu City Assessor’s Office. Gitahud niini ang desisyon sa Civil Service Commission (CSC) sa Region 7 niadtong October 7, 2023, diin naglatid nga dili balido ang ilang reassignments. (BANAT NEWS)