CEBU, Philippines — Nanumpa sa ilang katungdanan ang mga opisyal sa Association for United Womens in Mantuyong atol sa gipahigayon nga general assembly nga gihimo sa mga sakop niini niadtong Sabado, Mayo 11, 2024.
Si Mandaue City Mayor Jonas Cortes maoy mipapanumpa kanila nga gisaksihan usab nila ni Bise Mayor Glenn Bercede ug ubang mga sakop sa konseho sa Dakbayan sa Mandaue.
Gihimo sa grupo ang maong general assembly sa mga miyembro aron madugangan pa ang pagpalig-on sa ilang kahugpungan sa kababayen-an sa barangay Mantuyong.
Gisaad sa mga opisyal sa asosasyon ang paghimo sa ilang responsibilidad alang sa kaangayan ug pagtabang alang sa kalambuan sa ilang grupo.
Si Mayor Cortes nagpasalamat sa asosayon sa ilang kahiusahan ug gipanghinaot ang pagpakabana sa matag-member.
Gitimbaya sa mayor ang grupo sa kababayen-an pinaagi sa iyang mainiton nga greetings alang sa Mother's Day kagahapon.
Apil sa nitambong sa kalihukan sa kababayen-an sa Mantuyong mao ang mga konsehales nga sila si Maline Cortes-Zafra, Oscar Del Castillo, ug Brgy. Captain Toto Lumapas.
Adunay gihimo usab nga mga pa-premyo gikan ni Mayor Cortes ug mga kauban. — /MEL (BANAT NEWS)