Lalaki giunay og pusil sa  silingan nga adunay pagdumot

CEBU, Philippines — Nalandig sa tambalanan ang usa ka 26-anyos nga lalaki human kini pusila duha ka higayon sa tiyan sa iyang kaila diha sa Sitio Upper, Barangay Carreta, Siyudad sa Sugbo kagahapon sa kadlawon.

Ang biktima usa ka pintor, residente sa maong lugar ug ang suspetsado kinsa daling nisibat human sa hitabo silingan ug kaila sa biktima ang padayon pa nga gipangita sa kapolisan sa Mabolo Police Station.

Base sa taho sa kapolisan nga ang biktima ug ang suspetsado nag-estoryahanay kini ug pagkataud-taod adunay nabating buto sa armas.

Base sa imbestigasyon sa kapolisan giingong ang suspetsado adunay kasuko ngadto sa biktima tungod kay dihang menor de edad pa sila nadakpan sila ug nadala sa Operation Second Chance ug sulod sa pasilidad giingong gaaway ang duha.

Ang suspetsado nagdumot kini sa biktima hinungdan nga giatangan kini sa suspetsado ug gipusil.

Nasayran nga ang biktima adunay kasong pagpangawat hinungdan nga nadala kini sa Operation Second Chance kaniadto samtang ang suspetsado giingong nalambigit sa ilegal nga drugas ug uban pang krimen.

Sa laing bahin, nadakpan sa niaging adlaw diha sa Barangay Pahina Central, Dakbayan sa Sugbo pinasikad sa warrant of arrest sa Cebu City Police Office (CCPO) ang usa sa mga suspetsado sa pagpamusil niadtong Marso 6, 2024 diha gawas sa usa ka bar sa Pelaez Street, Barangay Kalubihan niining siyudad.

Ang suspek nga si alyas  Ar-Ar , 23 anyos, residente sa Barangay Pahina Central natingkagol karon sa custodial facility sa CCPO.

Matod ni Police Lieutenant Colonel Janette Rafter nga ang suspetsado adunay upat ka pending warrant of arrest sa kasong murder ug frustrated murder ug ang ikalima niyang kaso nga murder tungod sa giingong pagpatay niini sa 32-anyos nga lalaki nga taga Lungsod sa Dalaguete diha gawas sa bar human aduna kini gikalalis.

Ang suspetsado wala kini nihatag og pamahayag sa mga tigbalita dihang gikuhaan sa iyang habig.

Sa laing bahin usab, nasikop ang usa ka kargador diha sa Carbon Public Market human kini nakuhaan og .38 kalibre nga revolver nga dunay tulo ka buhing bala dihang giimplementar sa kapolisan sa Carbon Police Station ang search warrant batok sa suspetsado niadtong Martes sa gabii diha sa Sitio Bato, Barangay Ermita, siyudad sa Sugbo.

Si Regional Trial Court (RTC) Judge Anacleto Debalucos sa Branch 17 ang niluwat og search warrant batok kang Warlito Baar alyas  Opaw .

Ang suspetsado nangangkon nga sa iyahang higala ang maong armas.

Base sa report sa kapolisan si Baar suspek sa pagpusil sa usa ka lalaki niadtong Marso 23, 2024 diha sa Sitio Pig Vendor, Barangay Ermita.

Ang suspetsado nangangkon usab kini nga gituok sa biktima ang iyang anak nga niadtong higayona nagduwa hinungdan nga gipusil niya kini.  Gawas niini, nakadawat usab og report ang kapolisan nga ang suspek maoy magpabuto og armas diha sa ilang lugar. (BANAT NEWS)