Rotunda nga ibutang sa UN Avenue palapdan

CEBU, Philippines — Palapdan pa sa mga proponent sa roundabout system sa UN Avenue, Siyudad sa Mandaue ang rotunda nga ibutang sa maong dapit subay sa tinguha nga mas mahimong epektibo ang ipatuman nga sestema sa usa sa mga pinaka-busy nga dalan sa siyudad sa Mandaue.

Si Gobernador Gwendolyn Garcia uban sa mga opisyal sa lokal nga kagamhanan sa Dakbayan sa Mandaue ug sa Department of Public Works and Highways (DPWH) padayon sa ilang diskusyon uban sa mga stakeholder alang sa pagpalambo sa maong roundabout system.

Matud sa Kapitolyo pinaagi sa news portal niini nga adunay positibo nga kalamboan sa diskusyon human niuyon na ang tag-iya og luna sa maong dapit sa himuong pagpalapad sa area bisan og aduna kini epekto sa ilang property.

Atol sa gihimong simulation sa roundabout system sa UN Avenue Dakbayan sa Mandaue nidationg Abril 14, 2024 nakamugna kini og grabeng kahuot sa trapiko diha sa lugar ug daghan sa mga motorista ang nisaway sa gihimong simulation.

Nasayran nga nangita og paagi ang proponents sa roundabout system nga mas mapalambo pa ang pagpatuman niini susama diha sa Fuente Rotunda, Dakbayan sa Sugbo.  (BANAT NEWS)