Mga balay sa Taloot gipang-ransack sa mga armadong tawo

CEBU, Philippines — Makig-alayon ang Philippine Drug Enforcement Agency (PDEA)-7 sa Argao Police Station kini aron matabangan sila nga makaduol sa mga nagpuyo sa duha ka balay sa SItio Himongbongan, Barangay Taloot, Lungsod sa Argao kinsa ang mga balay giingong gi-ransack sa napulo ka tawo nga mga armado ug nagtaptap sa ilang mga nawong ug giingong nagpila nga mga sakop sa PDEA niadtong Martes.

Si Leia Alcantara, tigpamaba sa PDEA niklaro nga niadtong Martes wala sila’y operasyon nga gihimo sa Lungsod sa Argao ug accounted tanang miyembro nila.

Ang maong mga grupo nga nihimo sa maong daotang binuhatan klaro nga nigamit lang sa ngalan sa PDEA.

Matud ni Alcantara nga dili na bag-o kanila nga adunay mogamit sa ngalan ilang ahensiya.

Ug ang paggamit sa ngalan sa PDEA usa sa gitawag nila og occupational hazard sa ilang pagpanarbaho.

Giawhag ni Alcantara ang publiko nga kong adunay impormasyon mahitungod sa grupo o personalities nga magpaila nga miyembro kunohay sa PDEA i-report dayon kini kanila arong maaksyonan.

Sa laing bahin, usa ka freelance layout designer ang nasikop atol sa buy-bust operation sa PDEA Bohol Provincial Office uban sa Bohol MARPSTA ug Tagbilaran City Police Station diha sa Purok 6, Barangay Cogon, Tagbilaran City.

Ang nasikop mao si Chris Ipanag, 45-anyos, taga Barangay Booy sa maong dakbayan.

Nasakmit gikan sa suspetsado ang 16 ka putos nga shabu nga nitimbang ngadto sa 775 gramos nga nikantidad tanan ngadto sa 5,270,000, buy-bust money, cellphone ug non-drug items.

Matud ni Alcantara nga ang suspetsado nasikop niadtong tuig 2019 sa mao gihapong kalapasan ug nipaubos kini sa plea bargain.

Ug gikatahong makadispatsar kini og 500 gramos ngadto sa usa ka kilo nga shabu matag semana.

Nunot niini, dako og epekto sa supply sa ilegal nga drugas sa Central Visayas ang pagkasakmit sa 2,000 ka kilong ilegal nga drugas nga nikantidad ngadto sa P13 bilyones didto sa Alitagtag, Probinsiya sa Batangas matud PDEA-7.

Subling gipadayag ni Alcantara nga walay supplier sa ilegal nga drugas nga gikan sa Central Visayas diin kasagaran nilang makompiska nga ilegal nga drugas naggikan sa Luzon area ug ipalusot lang dinhi sa rehiyon 7.  (BANAT NEWS)