Polis gikawatan sa usa ka sakop sa LGBT

CEBU, Philippines — Nadakpan ang usa ka sakop sa LGBT human niini giingong gikawat ang cellphone sa usa ka police nga nag-duty diha duol sa usa ka mall sa F. Ramos Street, Barangay Sta. Cruz, Siyudad sa Sugbo niadtong Martes sa buntag.

Ang suspetsado mao si alyas “Arnel”, 37-anyos, residente sa Barangay Lorega San Miguel niining siyudad. Ang suspetsado nasikop usab kini sa polis nga adunay ranggo nga Patrolman nga iyahang gikawatan og cellphone.

Ang nahisgutang polis nadestino kini sa Cebu City Mobile Force Company sa Cebu City Police Office ug taga Barangay Subangdaku, Dakbayan sa Mandaue.

Ang kapolisan aduna kini gisubay nga palisiya nga gidili ang paggamit og cellphone samtang naka-duty kini gawas lang kong kinahanglan sa ilang trabaho sama sa paghatag og situation reports hinungdan nga gibutang sa biktima ang iyang cellphone sa pocket sa iyang motorsiklo nga giparada duol usab sa iyang nahimutangan.

Si Police Major Mark Don Alfred Leanza, hepe sa Abellana Police Station nagkanayon nga alas 3:00 sa kadlawon niadtong Lunes na-assign diha sa nahisgutang dapit ang biktima diin nagbantay kini diha sa palibot.

Ang suspetsado nakakita kini og higayon nga makuha ang cellphone sa polis tungod kay nalipat kini.

Ang suspetsado daling nisibat pahilayo sa lugar human niini makuha ang cellphone sa polis.

Humana nabantayi sa biktima nga nawagtang ang iyang cellphone dali niining gi- review ang footage sa closed circuit television diha sa duol nga establisamento ug nakita ang dagway sa suspetsado ug nihimo dayon kini og hot pursuit operation.

Niadtong Martes sa buntag samtang nagkaon ang biktima diha duol sa lodging house sa dalan Colon, Barangay Parian nakita niini ang suspetsado nga niagi ug gisikop niya kini. (BANAT NEWS)