Kanhi president Duterte moanhi sa Sugbo karong Biyernes

CEBU, Philippines — Gipaabot nga moanhi sa dakbayan sa Sugbo karong Biyernes si kanhi President Rodrigo Roa Duterte.

Gipahibalo ni Cebu City mayor Michael Rama nga ang kanhi presidente uban sa pipila ka mga opisyal ubos sa partido PDP Laban ang mopahigayon og convergence of leaders and believers.

Suma pa ni Rama nga kini nagpakita lang nga anaa pa ang presensya sa PDP Laban ug buhi pa usab sila diin ang kanhi Presidente maoy chairman.

Wa ibutyag sa mayor kun si kinsa ang mga manambong sa kalihukan apan sayod siya nga naa gayud ang mga opisyal niini sama nila ni Sen. Bong Go, Sen. Robin Padilla ug uban pa.

Aduna na usab gihimo nga pagpangandam ang mga sakop sa PDP laban alang sa mao nilang kalihukan.

Si mayor Rama nitug-an nga wala pa hinoon silay plano alang sa convergence sa mga supporters tungod kay sayod siya nga aduna silay daghan nga supporters ug unahon lang una sa pagtigum ang mga opisyal sa PDP. (BANAT NEWS)