CEBU, Philippines — Nakab-ot na sa Bantayan District Hospital sa isla sa Bantayan ang level 1 nga status isip health facility.
Si Dr. Jaime Bernadas, ang regional director sa Department of Health (DOH-7) nipirma sa License to Operate isip Level One Hospital niadtong Abril 16. Kini nagpasabot nga ang maong tambalanan mamahimo na nga makapahigayon og operasyon sama sa caesarian section sa mga mabdos.
Ang Probinsya sa Sugbo bag-o pa lang nihimo og pagpalambo sa BDH subay sa tinguha nga mahimo kining level 1 hospital.
Apil sa gihimo mao ang retrofitting sa main laboratory sa hospital, pagconvert sa building ngadto sa hazard waste storage facility ug pagpamintal. Nigasto ang kapitolyo niini og P5.5 million.
Ang BDH nga usa ka infirmary ug adunay 25 bed nga kapasidad, makaatiman na karon og daghang pasyente isip Level 1 hospital nga maka accomodate og dili mominus sa 100 beds.
Giaprobahan usab ni Garcia ang request nga magdugang og mga doctor ug nurses sa maong tambalanan lakip na ang dugang higdaanan ug ubang ekipo.
Ang pagpirma sa license to operate isip level 1 hospital sa BDH nahitabo atol sa paglusad sab sa ikaduhang SUGBUCAS Center nga gipangulohan ni gobernador Gwendolyn Garcia.
Usa ka tripartite agreement ang gipirmahan nila ni DOH 7 director Dr. Jaime Bernadas ug VSMMC chief of hospital Dr. Gerardo Aquino Jr. diin ang VSMMC ug DOH mopadala og mga medical professionals ngadto sa mga gidumala nga hospital sa Probinsya didto sa Norte alang sa ambulatory ug ubang dinaliang medical nga panginahanglan sa mga Sugboanon. (BANAT NEWS)