Rama matag adlaw mobisita sa CCSC

CEBU, Philippines — Si Mayor Michael Rama sa Dakbayan sa Sugbo adlaw-adlaw na nga mohimo og pakisusi diha sa Cebu City Sports Center (CCSC) isip pagpangandam sa Palarong Pambansa.

Tumong sa pagbisita ni Rama matag adlaw diha sa CCSC aron mahatagan og saktong pagtagad ang ilang mga gihimo nga pagpangandam sa ipahigayon nga Palarong Pambansa sa Dakbayan sa Sugbo karong umaabot nga buwan sa Hulyo. Matud in Rama nga gitinguha sa siyudad nga anhi lang sa Dakbayan sa Sugbo ipahigayon ang kalihokan sa Palarong Pambansa ug dili na angayan pa nga moadto sa laing lugar.

Niadtong Lunes gipadayag usab ni Rama nga gisusi niya ang kahimtang sa giayo nga pasilidad alang sa Centra Visayas Regional Athletic Association nga ipahigayon karong buwan sa Mayo niining tuiga ug Palarong Pambansa buwan sa Hulyo.

Gitudlo ni Rama si Engineer Ricky Dakay nga maoy mangulo sa kinatibuk-an nga civil works sa CCSC.

Nasayran nga si Rama adunay mga nakita nga angayang buhaton diha sa sulod ug gawas sa nahisgutang lugar. BDB BANAT NEWS