PRO-7: Walay na-stranded nga pasahero atol sa rally

CEBU, Philippines — Walay natala nga kasamok ang Police Regional Office (PRO)-7 sa gipahigayong Tigil Pasad kagahapon sa transport group nga PISTON kini subay sa gihimo nilang monitoring.

Ang PRO-7 nangandam sa duha ka adlaw nga Tigil Pasada nga gasugod kagahapon diin naka-standby ang ilahang mga patrol car nga andam mopasakay sa mga pasahero nga ma-stranded gumikan sa maong tigil pasada.

“According to the reports from the ground wala man pod tay na-stranded, everything is okay and just in case naay instruction atong regional director Police Brigadier General Anthony Aberin mag-provide og free ride for those who will be stranded”, matud ni Police Lieutenant Colonel Gerard Ace Pelare, tigpamaba ni PRO-7.  Adunay security preparations nga gihimo ang kapolisan aron masiguro nga hapsay ug malinawon nga mapahigayon ang kalihokan.

Nasayran nga ang mga drayber, operators ug supporters naghimo og upat ka rally centers diha sa Mabolo, Carreta, P. Del Rosario Street ug Gorordo Avenue aron ipakita ang ilang pagsupak sa nagkaduol nga deadline sa consolidation PUV drivers ug operators.

Ang grupo aduna kini gibitbit nga mga placard nga adunay suwat nga ihunong ang PUV phase out ug uban pa nilang yangongo.

Gitataw sa PISTOn nga supak sila sa maong consolidation tungod kay imbes ilaha gihapon ang prangkisa adto na kini sa kooperatiba diin dili siya uyon niini.

Nanghinaot sila nga paminawon sa administrasyon ni Presidente Ferdinand Marcos, Jr., ang yangongi sa mga drayber ingon man sa mga operator kalabot sa maong plano. (BANAT NEWS)