Sunog sa M Velez nagbilin og P12m danyos
CEBU, Philippines — Niabot sa P12 milyones ang gibiling danyos sa sunog nga miigo sa residential area nga nahimutang sa 148V M. Velez Street, Barangay Guadalupe, siyudad sa Sugbo kagahapon sa kaadlawon.
Sa report sa Cebu City Fire Station, nahitabo ang sunog alas 3:16 sa kaadlawon kagahapon nga miabot hangtud alas 6:25 una kini napawong sa kabomberohan.
Upat ra ka balay ang apektado sa sunog ug duha niini totally burned ug duha sab ang partially burned. Wala ibutyag kun kang kinsa nga balay kini nagsugod.
Sa pagkakaron padayon ang gihimong imbestigasyon sa kabomberohan kun asa ug unsay hinungdan sa sunog nga nitumaw kagahapon sa kaadlawon.
Samtang dul-an tunga sa milyon ka pesos ang danyos sa sunog nga nahitabo sa Sisters of Saint Francis of Perpetual Adoration sa Barangay Maghaway, Dakbayan sa Talisay kagahapon sa udto.
Ang sunog nitumaw mga alas-12 sa udto ug gideklarar dayon kini sa first alarm mga alas 12:06 sa udto. Nakontrolar ang kayo alas 12:20 sa udto dayon na fire out mga alas 12:22 sa udto.
Naugdaw ang storage room o ang lugar nga naa ang generator set. Ang danyos niabot sa P480 mil. Padayon pa ang kabumberohan sa ilang pagimbestigar sa maong panghitabo nga sunog. (BANAT NEWS)
- Latest
