Eksperimentong “rotunda” sa UN Ave. ug DM Cortes gisaway

CEBU, Philippines — Nakadawat og pagsaway gikan sa mga motorista ug sa publiko ang gihimong dry-run sa gisugyot nga roundabout sa usa sa mga intersection sa siyudad sa Mandaue.

Ang Probinsya sa Sugbo ug ang lokal nga kagamhanan sa Mandue ug ang Department of Public Works and Highways (DPWH) gusto nga adunay tukorong rotunda sa intersection sa U.N Avenue ug sa dalan  D.M Cortes sa Mandaue.

Niadtong Domingo gihimo ang “experimental rotunda” sa maong dapit niadtong Domingo sa hapon.  Apan kadaghanan sa mga nilabay sa lugar nangreklamo tungod sa grabeng trapiko.

Ang ubang motorista midangop sa social media aron didto ipadayag ilang pagsaway ug reklamo batok sa maong eksperimento. Duna say misaway sa kagamay sa maong rotunda kun itandi sa rotunda sa Fuente Osmeña.

“Maglisod ni labi ang mga moagi nga 10- wheelers prime mover with 40ftr trailer. Mokawat pa na og lane. Delikado pa sa motor kung pataka og lusot,” usa sa mga netizen nikomento sa post sa Sugbo News, ang portal sa Probinsya sa Sugbo.

Human sa maong simulation niadtong Domingo, Abril 14,  mihimo og assessment ang mga opisyal sa kapitolyo gipangulohan ni Gobernador Gwendolyn Garcia ug Mandaue city Mayor Jonas Cortes.  Misaad ang probinsya nga mangita og paagi aron nga mapalambo ang himoong roundabout system.  “Among the things noted were the need to widen the roads to allow for a bigger rotunda, as well as move the roundabout circle towards corner D.M. Cortes St. so that lots already acquired by the city will be utilized,” sumala sa taho sa Sugbo News, ang news portal sa Probinsya sa Sugbo.

Apil sa himoon ang panghingusgan ang information drive ug pagbutang og igong signage alang sa mga motorista aron magiyahan daan kun asa nga dalan moagi aron dili matanggong sa traffic.

Si Garcia makigtagbo pud sa mga tag-iya sa mga luna sa dapit apil na sa mga telecommunication companies ug utility firms kansang mga estraktura anaa sa dapit sa roundabout area aron hisgutan ang mga termino nga himoon aron mapalambo ang maong sistema nga ipatuman. (BANAT NEWS)